Kanë përfunduar katër ndeshjet e xhiros së shtatë në Superligën e Kosovës në futboll.
Drita ka shënuar fitore të rëndësishme në shtëpi ndaj Dukagjinit, duke triumfuar me rezultatin 3-1.
Mysafirët nga Klina e nisën më mirë takimin dhe kaluan të parët në epërsi me golin e mesfushorit të talentuar Dienit Isufi në minutën e 20-të. Megjithatë, reagimi i “Intelektualëve” ishte i menjëhershëm, pasi vetëm tre minuta më vonë Liridon Balaj barazoi shifrat (23’).
Pas kësaj, skuadra gjilanase e mori plotësisht ndeshjen në dorë. Ish-sulmuesi i Dukagjinit, Arb Manaj, shënoi në minutën e 54-t për të përmbysur rezultatin, ndërsa Salifu Ibrahim vulosi fitoren në minutën e 86-të, duke përfituar nga një top i kthyer.
Me këtë fitore, Drita ngjitet në pozitën e pestë me tetë pikë të grumbulluara, ndërsa Dukagjini zbret në vendin e tretë me 13 pikë.
Llapi më në fund ka shijuar fitoren e parë në këtë sezon të Superligës së Kosovës, duke triumfuar bindshëm ndaj Gjilanit me rezultat 4-1.
Me këtë fitore, llapjanët arrijnë kuotën e gjashtë pikëve, aq sa kanë edhe Prishtina e Re dhe Ferizaj në fundin e tabelës. Nga ana tjetër, Gjilani mbetet me shtatë pikë në vendin e shtatë.
Në Lipjan, Ballkani nuk hasi vështirësi, duke mposhtur Prishtinën e Re me rezultat të pastër 0-3. Kjo fitore e çon skuadrën suharekase në kuotën e 15 pikëve, një më pak se lideri Prishtina, ndërsa Prishtina e Re bie në vendin e nëntë me gjashtë pikë.
Spektakël i vërtetë u pa në Skënderaj, ku Malisheva arriti një fitore dramatike 3-4 ndaj Drenicës, duke shënuar golin vendimtar në sekondat e fundit të ndeshjes.
Pas kësaj fitoreje, Malisheva ngjitet në vendin e pestë me 10 pikë, derisa Drenica mbetet e katërta me 11 pikë
