Everton po planifikon një lëvizje befasuese për sulmuesin pa klub Jamie Vardy, pas një dite të afatit kalimtar katastrofike, raportohet në Angli.
“Blutë” dështuan në një tentativë të vonshme për të transferuar sulmuesin e Monacos, Florian Balogun, në orët e fundit të Ditës së Afatit Kalimtar, më 1 shtator, pasi 25-vjeçari ndryshoi mendje.
David Moyes ishte i vendosur të shtonte një sulmues qendre në skuadër, pasi kishte dhënë dritën jeshile për largimin e Beto për 17 milionë funte drejt Fiorentinas, ndërsa tentoi edhe një huazim të vonshëm për Joshua Zirkzee të Manchester Unitedit, por “Djajtë e Kuq” i refuzuan përpjekjet e tyre.
Një fund jashtëzakonisht zhgënjyes i afatit kalimtar, që përfshiu edhe transferimin e Iliman Ndiaye te Manchester City për 65 milionë funte, ka bërë që Moyes të ketë Thierno Barryn si të vetmin sulmues të tij të nivelit të parë.
Evertoni është lidhur me një lëvizje befasuese për ish-sulmuesin e Manchester Unitedit, Anthony Martial, pas largimit të tij nga klubi meksikan Monterrey në qershor, por ai nuk është i vetmi lojtar që po synohet nga klubi anglez.
Sipas “The Sun”, Evertoni po shqyrton një lëvizje befasuese për veteranin Jamie Vardy, i cili është pa klub pasi u largua nga Cremonese në Serie A në fund të kontratës së tij.
Vardy, 39 vjeç, është në kërkim të klubit të radhës dhe me shumë gjasë të fundit në karrierën e tij profesionale, ndërsa në janar do të mbushë 40 vjeç dhe beson se ende mund të performojë në nivelin më të lartë.
Anglezi është lidhur me një numër të madh transferimesh këtë verë, përfshirë një kalim befasues te gjiganti brazilian Sao Paulo, ndërsa edhe Wrexham, klub i Championship, tentoi ta transferonte veteranin në ditën e fundit të afatit kalimtar.
Vardy, në fakt, refuzoi ofertat e Rob McElhenney dhe Ryan Reynolds dhe po shqyrton mundësitë e tij – përfshirë një sërë ofertash nga Serie A dhe MLS – tani që afati kalimtar është mbyllur.
Një lëvizje e dëshpëruar e Evertonit për të nënshkruar me Vardyn do të ishte vetëm një tjetër shembull i planifikimit të dobët të klubit gjatë afatit kalimtar.
Edhe pse ish-reprezentuesi i Anglisë ka shënuar 145 gola në 342 paraqitje në Premierligë, mosha nuk është më në anën e tij dhe rënia e tij gjatë viteve të fundit ka qenë e pritshme.
Legjenda e Leicester Cityt nuk është më në gjendje të prodhojë paraqitje në nivelin më të lartë, siç bëri vite më parë në “King Power Stadium”, kur i udhëhoqi ata drejt titullit të Premierligës në vitin 2016 dhe FA Cup në vitin 2021.
Megjithatë, vetëbesimi i Vardyt është i pakrahasueshëm dhe, pasi shënoi nëntë gola në sezonin e tij të fundit në elitë, 2024/25, ai do të besojë se mund t’i shtojë një dozë të cilësisë së tij në realizim skuadrës së Moyesit.
Kur foli për mundësinë e pensionimit në fillim të këtij viti, ai shpjegoi se beson se trupi i tij do t’i tregojë kur të vijë momenti i duhur për t’i varur këpucët në gozhdë.
“Fizikisht dhe mentalisht, futbolli është një vrasës. Është një sforcim shumë i madh për trupin dhe mendjen tënde, kështu që thjesht dua ta harroj plotësisht. Sigurisht që e dua. Nëse nuk do ta doja ende, nuk do të vazhdoja të luaja”, i tha ai “Untold UK”.
“Fatmirësisht për këta djem [i godet të dyja këmbët me shuplakë], ata ende po më tregojnë se për momentin janë në rregull”, shtoi Vardy.
“A e shoh veten në jetën pas futbollit? Trajner? Jo. Nuk kam menduar kurrë aq larg. Unë jam shumë një person i tipit ‘ta mbarojmë ditën e sotme, të flemë dhe të shohim se çfarë sjell e nesërmja’. Gjithmonë kam qenë kështu, gjë që i bezdis disa njerëz, e di”, e mbylli ai.
