Rusia ka kryer një sulm masiv ajror ndaj qytetit të Kievit, duke përdorur qindra dronë dhe disa raketa.
Sipas raportimeve të zyrtarëve, të paktën një person ka humbur jetën dhe 24 janë plagosur, ndër të cilët janë edhe pesë persona të hospitalizuar, përfshirë një grua shtatzënë.
Shefi i administratës ushtarake të qytetit të Kievit, Timur Tkachenko, deklaroi se “rusët godasin godina banimi”. Ai shtoi se janë prekur shumë ndërtesa me kate të shumta në të gjitha lagjet e kryeqytetit.
Kryetari i Kievit, Vitali Klitschko, konfirmoi se të paktën 11 ndërtesa të larta janë goditur gjatë sulmit.
Sipas shërbimit ukrainas të emergjencës, ekipe shpëtimi kanë evakuuar mbi 40 persona nga ndërtesat e prekura. Një zjarr shpërtheu në lagjen Desnjansky në një ndërtesë me kate nga e pesta deri në të tetën, ku një person humbi jetën.
Përveç banesave, janë dëmtuar edhe një spital, një shkollë dhe objekte sportive prej druri. Klitschko njoftoi gjithashtu për dëmtime në rrjetin e ngrohjes së qytetit, ndërsa shërbimet emergjente janë duke vlerësuar përmasat e dëmit.
Në rajonin më të gjerë të Kievit, u raportuan 6 të plagosur, përfshi një fëmijë 7-vjeçar që mori lëndime në fytyrë dhe iu ofrua ndihmë mjekësore. Shtëpi, depo, fabrika dhe automjete u goditën nga sulmi.
Ndërkohë, forcat ajrore ukrainase raportuan se mbi 120 dronë dhe dhjetëra raketa kryqëzuese dhe balistike janë dërguar drejt kryeqytetit dhe pjesëve të tjera të vendit. Një sërë paralajmërimesh për rrezik ajror ishin në fuqi në të gjithë vendin.
Që nga fillimi i pushtimit në shkurt 2022, Rusia vazhdon të kryejë sulme të mëdha mbi qytetet ukrainase. Kohët e fundit, ajo ka shtuar goditjet ndaj infrastrukturës energjetike për të vështirësuar situatën në Ukrainë para dimrit. /
