Presidenti i SHBA-së, Donald Trump, ka konfirmuar raportimet se i ka dhënë presidentit ukrainas Volodymyr Zelensky një ultimatum për t’iu përgjigjur planit amerikan me 28 pika për t’i dhënë fund luftës, me afat deri më 27 nëntor, Ditën e Falënderimeve.
“Ne mendojmë se është një ditë e mirë, është një kohë e mirë”, deklaroi Trump, duke shtuar se ekziston një “dritare” për zgjatjen e afatit nëse bisedimet me Ukrainën “shkojnë mirë”.
Komentet i bëri në radion Fox News, siç raporton BBC.
I pyetur për propozimin 28-pikësh, ai theksoi se SHBA-të janë të përfshira “për një arsye – ne duam që vrasjet të ndalen”.
Sa i përket shqetësimeve perëndimore se Rusia mund të paraqesë në të ardhmen një kërcënim ndaj shteteve baltike apo pjesëve të tjera të Europës, Trump u shpreh se Moska nuk do ta bëjë një gjë të tillë. “Ata nuk po kërkojnë më shumë luftë. Ata tashmë po ndëshkohen”, nënvizoi presidenti amerikan.
Në intervistën e tij, Trump përsëriti se nëse lufta vazhdon, Ukraina rrezikon të humbasë edhe më shumë territor “në një periudhë të shkurtër kohore”.
Sipas tij, Zelensky i ka bërë të ditur administratës se është i gatshëm të negociojë, por Shtëpia e Bardhë dhe tani vetë Trump kërkojnë që plani të nënshkruhet deri më 28 nëntor.
Plani me 28 pika parashikon, ndër të tjera, që Kievi të lëshojë territor shtesë, të pranojë se nuk do t’i bashkohet kurrë NATO-s dhe të ofrojë amnisti të plotë për rusët e dyshuar për krime lufte.
