Remitencat e diasporës kanë konfirmuar edhe gjatë vitit 2024 rolin e tyre si një nga shtyllat kryesore financiare për vendet e Ballkanit, duke ndikuar drejtpërdrejt në konsumin familjar dhe stabilitetin ekonomik. Sipas të dhënave të publikuara nga Eurostat, miliarda euro janë dërguar nga mërgimtarët drejt vendeve të origjinës, duke mbajtur gjallë ekonomitë kombëtare të rajonit.
Kosova vazhdon të kryesojë për nga niveli i varësisë nga remitencat, me rreth 1.32 miliardë euro të dërguara nga diaspora gjatë vitit të kaluar. Kjo shumë përbën afërsisht 12.7 për qind të Prodhimit të Brendshëm Bruto, duke e renditur vendin në krye të rajonit sa i përket peshës së remitencave në ekonomi.
Në vlera absolute, Kroacia qëndron në krye me rreth 2.27 miliardë euro remitenca, megjithatë ndikimi i tyre në ekonomi është më i kufizuar, rreth 2.6 për qind e PBB-së. Bosnje dhe Hercegovina vijon të mbetet ndër vendet më të varura nga paratë e diasporës, me rreth 1.99 miliardë euro ose 7.6 për qind të PBB-së.
Shqipëria ka përfituar rreth 1.28 miliardë euro gjatë vitit 2024, një shumë që përfaqëson rreth 5.1 për qind të ekonomisë kombëtare. Në anën tjetër të renditjes, Mali i Zi dhe Maqedonia e Veriut shënojnë nivele më të ulëta të remitencave, me përkatësisht 345 milionë euro dhe 310 milionë euro të dërguara nga diaspora.
Ekspertët vlerësojnë se remitencat janë thelbësore për mbulimin e shpenzimeve bazë, uljen e varfërisë dhe ruajtjen e stabilitetit social në rajon. Megjithatë, ata theksojnë se sfida kryesore mbetet orientimi i këtyre mjeteve drejt investimeve afatgjata dhe zhvillimit të qëndrueshëm ekonomik, në mënyrë që varësia nga diaspora të shndërrohet në potencial zhvillimor.
