Një problem shqetësues ka dalë në pah në sistemin digjital të Kosovës: domaini rks-gov.org, që duket më zyrtar se faqja aktuale .net e qeverisë, ka qenë i lirë dhe mund të blihej për vetëm 10 euro. Fatmirësisht, një inxhinier nga Gjilani e bleu dhe e ridrejtoi te faqja zyrtare, duke parandaluar një rrezik të madh për qytetarët.
Por ky incident nuk mund të shikohet si një lajm i mirë. Eksperti i Teknologjisë Informative, Ermal Sadiku, paralajmëron se çdo mashtrues mund të kishte kopjuar faqen e domainit dhe të mblidhte të dhëna personale, familjare, kontakte dhe kredenciale login-i. Qytetarët do të mendonin se janë duke përdorur faqen zyrtare të shtetit, ndërsa të dhënat do të përfundonin në duar kriminale.
Sadiku kritikon qeverinë për mosmenaxhimin e sigurisë digjitale dhe për mungesën e standardeve dhe përgjegjësisë institucionale. Sipas tij, një shtet serioz duhet të sigurojë të gjitha variantet kritike të domainëve për të mbrojtur qytetarët, ndërsa mbështetja në heroizma individuale nuk mund të jetë zgjidhje.
“Digjitalizim pa siguri = rrezik kombëtar. Shtet që nuk mbron identitetin digjital = shtet që nuk mbron qytetarët,” thotë Sadiku, duke kërkuar veprime urgjente për standardizim, kontroll dhe përgjegjësi institucionale në fushën e sigurisë kibernetike.
