Moti ekstrem ka përfshirë një pjesë të madhe të Ballkanit dhe Evropës, duke shkaktuar viktima, përmbytje, ndërprerje energjie dhe kaos në transport.
Në Bosnje-Hercegovinë, një grua humbi jetën në Sarajevë pasi u godit nga një pemë e rrëzuar nga pesha e dëborës. Në Mostar, lumenjtë dolën nga shtrati, ndërsa në lindje të vendit u shpall gjendja e emergjencës për shkak të përmbytjeve nga lumi Drina.
Situata është rënduar edhe në Kosovë. Reshjet e dendura të shiut shkaktuan vërshime në Malishevë, Gjakovë, Junik, Deçan dhe Klinë, duke përmbytur rrugë e banesa dhe duke sjellë bllokime të kanalizimeve dhe vështirësi serioze në qarkullim.
Në Serbi, dhjetëra fshatra mbetën pa energji elektrike për shkak të dëborës, ndërsa në Mal të Zi, përmbytjet detyruan mbylljen e shumë rrugëve, veçanërisht në Ulqin, Podgoricë dhe Kolashin.
Bilanci i viktimave rëndohet në Francë, ku pesë persona humbën jetën për shkak të aksidenteve të shkaktuara nga ngricat dhe bora. Qindra fluturime u anuluan në Paris dhe Amsterdam, ndërsa në aeroportin Schiphol u raportuan mbi 400 anulime.
Në Itali, lumi Tiber doli nga shtrati në Romë dhe autoritetet kufizuan aksesin në parqe për shkak të rrezikut nga përmbytjet dhe rrëzimi i pemëve. Ndërkohë, Britania e Madhe dhe Skocia përballen me ndërprerje serioze të transportit, furnizimeve dhe mbyllje shkollash.
Autoritetet në mbarë kontinentin u bëjnë thirrje qytetarëve të shmangin udhëtimet e panevojshme, ndërsa parashikimet sinjalizojnë se kushtet e vështira të motit do të vazhdojnë edhe në ditët në vijim.
