Karim Benzema mund të largohet së shpejti nga Al Ittihad dhe nga Liga Profesionale Saudite, pas përplasjeve mes sulmuesit francez dhe klubit lidhur me rinovimin e kontratës.
Sipas medieve të huaja, oferta e paraqitur nga klubi saudit është konsideruar fyese nga lojtari 37-vjeçar, çka ka çuar në përshkallëzimin e situatës. Si pasojë, Benzema ka zgjedhur të mos jetë pjesë e ndeshjes së sotme ndaj Al-Fateh, e cila u mbyll me barazim 2-2.
Gazeta franceze “L’Equipe” raporton se Benzema kërkon një pagë të ngjashme me atë të Cristiano Ronaldos, rreth 200 milionë euro në sezon, ndërsa aktualisht ai përfiton afërsisht gjysmën e kësaj shume.
Al Ittihad, që drejtohet nga trajneri Sergio Conceiçao dhe aktualisht renditet në vendin e gjashtë në kampionat, thuhet se ka tentuar të përmbushë disa nga kërkesat e ish-lojtarit të Real Madridit, duke i ofruar një kontratë të përmirësuar që përfshin edhe të drejtat e imazhit.
Megjithatë, Benzema nuk duket i bindur nga propozimi i klubit dhe, sipas të njëjtave burime, një shkëputje e plotë mes palëve mbetet një mundësi reale në ditët në vijim
