Çmimet e naftës janë rritur në nivelin më të lartë në më shumë se dy vjet, pasi ministri i Energjisë i Katarit paralajmëroi se pret që të gjithë eksportuesit e naftës dhe gazit në Gjirin Persik të ndalin prodhimin brenda pak ditësh.
Saad al-Kaabi i tha “Financial Times” se konflikti në Lindjen e Mesme, një rajon që luan rol kyç në furnizimin global me energji dhe në rrugët e transportit detar, mund “t’i rrëzojë ekonomitë e botës”, raporton BBC.
Nafta Brent u rrit me më shumë se 9% të premten, duke kaluar mbi 93 dollarë për fuçi, që është niveli më i lartë që nga vjeshta e vitit 2023.
Rritja e çmimeve të naftës mund të ketë pasoja të gjera, jo vetëm në koston për mbushjen e automjeteve me karburant, por edhe në çmimin e disa formave të ngrohjes, ushqimit dhe mallrave të importuara.
Ka paralajmërime se, nëse çmimet e naftës dhe gazit – të cilat janë rritur ndjeshëm këtë javë – mbeten të larta, kjo mund të nxisë inflacionin në ekonomitë e mëdha botërore, si Mbretëria e Bashkuar dhe Shtetet e Bashkuara, ku ai ka qenë në një trend të përgjithshëm rënës.
Kaabi tha se nafta mund të arrijë në 150 dollarë për fuçi nëse konflikti me Iranin vazhdon gjatë javëve në vijim.
“Nëse kjo luftë vazhdon për disa javë, rritja e PBB-së në mbarë botën do të ndikohet. Çmimi i energjisë për të gjithë do të rritet. Do të ketë mungesë të disa produkteve dhe një reaksion zinxhir të fabrikave që nuk do të mund të furnizojnë”, i tha ai FT-së.
Ka pasur frikë se kriza aktuale mund të ketë ndikim të ngjashëm me pushtimin e Ukrainës nga Rusia, por deri tani rritja e çmimeve të naftës dhe gazit mbetet nën nivelet kulmore të përjetuara në vitin 2022.
Rreth një e pesta e furnizimit botëror me naftë zakonisht transportohet çdo ditë përmes Ngushticës së Hormuzit. Por trafiku në këtë kalim të ngushtë pothuajse është ndalur që kur lufta SHBA-Izrael me Iranin filloi fundjavën e kaluar.
