Kapiteni i Holandës, Virgil van Dijk, është bërë lojtari i parë që ka reaguar publikisht ndaj ndërprerjeve të reja për hidratim që FIFA ka vendosur të përdorë në Kupën e Botës 2026.
Mbrojtësi i Liverpool FC foli pas barazimit 2-2 të Holandës me Japoninë në Arlington të Teksasit, një ndeshje ku “Tulipanët” shpëtuan vetëm një pikë.
Van Dijk kaloi Holandën në epërsi me një gol me kokë në fillim të pjesës së dytë, por Japonia reagoi shpejt. Pas një tjetër avantazhi të holandezëve me golin e Crysencio Summerville, japonezët barazuan sërish në minutat e fundit për rezultatin përfundimtar 2-2.
Megjithatë, pas ndeshjes, vëmendja u përqendrua te një tjetër temë: ndërprerjet treminutëshe për hidratim, të cilat FIFA i ka bërë të detyrueshme në mes të secilës pjesë, pavarësisht temperaturës apo kushteve atmosferike.
Sipas rregullit të ri, arbitrat duhet ta ndalin lojën rreth minutës së 22-të të secilës pjesë, në mënyrë që lojtarët të hidratohen.
Van Dijk nuk e fshehu pakënaqësinë e tij ndaj kësaj praktike.
“Mendoj se këto ndërprerje janë shumë interesante, por jo në kuptimin pozitiv. Kam parë pothuajse të gjitha ndeshjet e turneut dhe sa herë që loja ndërpritet për reklama, nuk më pëlqen aspak. Mendoj se nuk është diçka e mirë as për shikuesit neutralë para televizorit”, deklaroi ai.
Sipas mbrojtësit holandez, ndërprerjet mund të kenë kuptim vetëm në rastet kur temperaturat janë vërtet të larta.
“Nëse është shumë nxehtë, atëherë mund të jenë të dobishme. Por çdo ndeshje duhet të vlerësohet veçmas. Nuk besoj se duhet të aplikohen automatikisht në çdo takim”, shtoi Van Dijk.
Kritikat ndaj kësaj risie nuk kanë ardhur vetëm nga futbollistët. Ish-trajneri i Liverpoolit, Jürgen Klopp, ka qenë edhe më i ashpër në komentet e tij.
Sipas Klopp, këto ndërprerje po prishin ritmin natyral të lojës dhe po përdoren më shumë për interesat komerciale sesa për mirëqenien e futbollistëve.
“Kur pashë lojtarët duke qëndruar në fushë gjatë pushimeve për hidratim, ndërsa ritmi i ndeshjes diktohej nga ndërprerjet televizive, pyeta veten: kujt po i shërben vërtet Kupa e Botës? Tifozëve, lojtarëve apo reklamuesve?”, tha Klopp.
Ai shtoi se futbolli rrezikon të shndërrohet në sfond të një shfaqjeje reklamuese.
“Një ndeshje e Kupës së Botës duhet të rrjedhë si një lumë. Në vend të kësaj, po ndërtojmë diga në mes të saj që reklamat të kalojnë. Futbolli ishte ngjarja kryesore, por tani rrezikon të bëhet muzikë në sfond për reklamuesit”, përfundoi trajneri gjerman.
Holanda do ta zhvillojë ndeshjen e radhës në Kupën e Botës më 20 qershor kundër Suedisë.
