Federata Egjiptiane e Futbollit ka kërkuar nga FIFA që t’i largojë nga turneu zyrtarët e ndeshjes pas humbjes kontroverse ndaj Argjentinës.
Në një nga ndeshjet më dramatike dhe emocionuese të Kupës së Botës 2026 deri më tani, kampionia në fuqi Argjentina siguroi kualifikimin në çerekfinale të martën.
Pavarësisht se ishte në disavantazh 2-0 ndaj Egjiptit, që dukej pranë një prej befasisë më të mëdha në historinë e Botërorit, Argjentina tregoi karakter dhe përmbysi gjithçka, duke fituar 3-2.
Golat e Cristian Romeros, Lionel Messit dhe Enzo Fernandez, i cili realizoi golin e fitores në minutën e 93-të, i siguruan Argjentinës kalimin në çerekfinale, ku do të përballet me Zvicrën.
Megjithatë, ndeshja ndaj Egjiptit u shoqërua me polemika të shumta. Egjiptit iu anulua një gol i shënuar nga Mostafa Zico pas ndërhyrjes së VAR-it, për shkak të një faulli në fillim të aksionit.
Më vonë gjatë takimit, egjiptianët pretenduan se ylli i tyre Mohamed Salah ishte penguar në zonën e penalltisë së Argjentinës vetëm pak sekonda përpara golit vendimtar të kampionëve në fuqi, në një incident të ngjashëm me atë që çoi në anulimin e golit të tyre.
Menjëherë pas përfundimit të ndeshjes, disa lojtarë dhe anëtarë të stafit teknik të Egjiptit hynë në fushë për të protestuar te gjyqtari francez Francois Letexier, i cili reagoi duke ndëshkuar trajnerët me kartonë të verdhë dhe të kuq.
Pas ndeshjes, si përzgjedhësi Hossam Hassan, ashtu edhe autori i golit Mostafa Zico, kritikuan ashpër arbitrimin, duke e cilësuar atë si “të padrejtë” dhe madje “të kurdisur”.
Tani, Federata Egjiptiane e Futbollit (EFA) ka publikuar deklaratën e saj të parë zyrtare për këtë takim, duke theksuar se “nuk mund të heshtë” për vendimet e arbitrimit.
Deklarata thotë: “Federata Egjiptiane e Futbollit nuk mund të heshtë për vendimet e arbitrimit gjatë ndeshjes ndaj Argjentinës, si dhe për mosshfrytëzimin e duhur të sistemit VAR. Disa incidente kyçe ngritën shqetësime serioze dhe lanë pikëpyetje të mëdha për qëndrueshmërinë dhe drejtësinë e vendimeve që ndikuan drejtpërdrejt në rrjedhën e ndeshjes. Një numër ekspertësh dhe analistësh të futbollit, si në nivel lokal ashtu edhe ndërkombëtar, kanë evidentuar incidente të diskutueshme dhe me ndikim gjatë ndeshjes. Kjo nënvizon rëndësinë e ruajtjes së standardeve më të larta të integritetit, drejtësisë dhe transparencës në arbitrim, veçanërisht në një kompeticion të rëndësisë së Kupës së Botës 2026”.
“Futbolli egjiptian gjithmonë ka respektuar parimet e lojës së ndershme, integritetit sportiv dhe respektit për futbollin. Pikërisht këto parime kërkojnë që të gjitha skuadrat të garojnë në kushte të barabarta dhe të trajtohen në mënyrë të barabartë. Ajo që ndodhi gjatë ndeshjes ka shkaktuar, me të drejtë, zhgënjim të madh te lojtarët, stafi dhe tifozët tanë, të cilët prisnin standardet më të larta të arbitrimit në skenën më të madhe të futbollit”, thuhet në deklaratë.
Në një deklaratë tjetër, EFA zbuloi se i ka kërkuar zyrtarisht FIFA-s largimin nga turneu të gjyqtarëve që drejtuan ndeshjen e 1/8 së finales.
Deklarata vazhdon: “Hany Abou Rida, presidenti i Federatës Egjiptiane të Futbollit, ka paraqitur një ankesë pranë FIFA-s, duke kërkuar hapjen e një hetimi ndaj gjyqtarit francez Francois Letexier, pas gabimeve të rënda të bëra nga ekipi i arbitrave dhe përdorimit të standardeve të dyfishta, të cilat çuan në humbjen e Egjiptit dhe eliminimin nga Kupa e Botës”.
Federata kërkoi gjithashtu hetim ndaj ekipit të arbitrave dhe zyrtarëve të VAR-it për atë që e cilësoi si “gabime të qarta” dhe “këmbëngulje për të mos rishikuar disa pamje”.
Po ashtu, ajo “kërkoi përjashtimin e gjyqtarit dhe të gjithë ekipit të arbitrimit nga Kupa e Botës pas hetimit të këtyre gabimeve”, duke pretenduar edhe se kishte ndodhur “diskriminim ndaj Kombëtares së Egjiptit”.
