Manchester Unitedi ka konfirmuar zyrtarisht vendndodhjen e propozuar për stadiumin e ri me kapacitet prej 100 mijë ulësesh, si pjesë e një projekti të madh për rigjenerimin urban të zonës përreth “Old Trafford”.
Njoftimi i klubit është pjesë e një plani më të gjerë zhvillimor, që synon ta shndërrojë zonën përreth stadiumit historik në një qendër moderne sportive, kulturore dhe argëtuese të nivelit botëror.
Klubi theksoi se vendndodhja është zgjedhur me qëllim që stadiumi i ri të ndërtohet pranë “Old Trafford”, në mënyrë që të ruhen historia, traditat dhe ritualet e ditëve të ndeshjeve, të cilat konsiderohen shumë të rëndësishme për tifozët.
Ky hap përfaqëson një moment të rëndësishëm në krijimin e një infrastrukture moderne, pa shkëputur lidhjen emocionale të klubit me shtëpinë e tij historike.
Drejtoresha ekzekutive për zhvillimin e stadiumit të ri te Manchester Unitedi, Collette Roche, deklaroi: “Publikimi i planit zhvillimor të Wharfside shënon një tjetër moment të rëndësishëm në rrugëtimin tonë drejt krijimit të një shtëpie të re të nivelit botëror për Manchester Unitedin, në zemër të një zone moderne dhe transformuese për Traffordin dhe Greater Manchesterin. Së bashku me partnerët tanë kemi një mundësi që vjen vetëm një herë në një brez për të krijuar një destinacion që do të sjellë përfitime afatgjata për tifozët, komunitetin lokal dhe të gjithë rajonin për dekada me radhë. Vendndodhja e propozuar për stadiumin është ideale, pasi ndodhet pranë Old Trafford, duke na lejuar të ruajmë trashëgiminë, traditat dhe atmosferën e ditëve të ndeshjeve, të cilat janë kaq të rëndësishme për tifozët tanë, ndërsa njëkohësisht krijojmë infrastrukturën dhe lidhjet e nevojshme për një përvojë të klasit botëror. Ne jemi të përkushtuar të ndërtojmë një stadium të nivelit botëror së bashku me tifozët tanë, jo thjesht për ta. Atmosfera, përballueshmëria financiare dhe qasja për të gjithë do të mbeten në qendër të planeve tona dhe mezi presim të vazhdojmë bashkëpunimin me tifozët dhe palët e tjera të interesuara në fazat e ardhshme të projektimit dhe zhvillimit”.
Sipas projektit, investimi pritet të kontribuojë me rreth 7.3 miliardë paund në vit për ekonominë e Mbretërisë së Bashkuar dhe të krijojë afërsisht 48 mijë vende të reja pune.
Zona prej 150 hektarësh nuk do të fokusohet vetëm te futbolli, por do të shndërrohet në një lagje moderne shumëfunksionale, e hapur për banorët gjatë gjithë vitit.
Kreu i Këshillit të Traffordit, Tom Ross, u shpreh: “Jemi shumë të lumtur që prezantojmë këtë plan zhvillimor, i cili shënon fillimin e një rrugëtimi të gjatë për ta bërë realitet këtë destinacion kulturor dhe sportiv të klasit botëror. Ne duam të krijojmë një vend të shkëlqyer jo vetëm në ditët e ndeshjeve, por çdo ditë të vitit. Prandaj dëshirojmë që sa më shumë banorë dhe biznese të marrin pjesë në procesin e konsultimeve dhe të kontribuojnë në formësimin e këtij vizioni. Wharfside do të shndërrohet në një rrjet lagjesh tërheqëse për të jetuar, punuar, shëtitur, eksploruar, pushuar me familjen, shijuar natyrën, takuar miqtë, ngrënë, pirë, bërë pazar dhe për t’u argëtuar. Zona do të përfshijë parqe moderne, hapësira pranë ujit, banesa, përfshirë edhe alternativa të përballueshme, qendra shëndetësore dhe arsimore, transport publik të integruar, si dhe ambiente të përshtatshme për ecje, çiklizëm dhe aktivitete fizike”.
