Franca dhe Spanja do të përballen nesër mbrëma në një nga ndeshjet më të mëdha të Kupës së Botës 2026, në një duel që shumëkush e kanë cilësuar si “finale para finales”.
Kampionët e Evropës dhe skuadra e Didier Deschampsit do të matin forcat në AT&T Stadium në Arlington të Teksasit, me synimin për të siguruar një vend në finalen e madhe të turneut.
Franca vjen në këtë përballje me një repart ofensiv të frikshëm, të udhëhequr nga kapiteni Kylian Mbappe, i cili ka realizuar tetë gola në gjashtë ndeshje dhe është një nga kandidatët kryesorë për “Këpucën e Artë”.
Përveç Mbappe-s, “Gjelat” kanë në dispozicion një sulm të mbushur me yje, ku bëjnë pjesë Michael Olise, fituesi i Topit të Artë Ousmane Dembele, si dhe dyshja e Paris Saint-Germainit, Bradley Barcola dhe Desire Doue.
Në anën tjetër, Spanja mbështetet te loja kolektive dhe filozofia e posedimit të topit që e ka karakterizuar ekipin e Luis de la Fuentes.
“Furia e Kuqe” ka arritur deri në gjysmëfinale falë një futbolli të organizuar, me mesfushorë si Rodri, Pedri dhe Fabian Ruiz që kontrollojnë ritmin e lojës, ndërsa Lamine Yamal mbetet një nga armët kryesore në sulm.
Kjo përballje pritet të jetë një duel mes dy stileve të ndryshme: Franca do të kërkojë të shfrytëzojë shpejtësinë dhe individualitetin e sulmuesve të saj, ndërsa Spanja synon ta kontrollojë ndeshjen përmes posedimit dhe presionit të vazhdueshëm.
Spanjollët kanë arsye për të qenë optimistë, pasi kanë rezultate pozitive ndaj Francës në vitet e fundit. Ata e mposhtën Francën 5-4 në një ndeshje dramatike të Ligës së Kombeve dhe triumfuan 2-1 në gjysmëfinalen e Euro 2024.
Ylli i Spanjës, Lamine Yamal, ka theksuar se skuadra e tij nuk ka frikë nga kampionët e botës.
“Jemi dy ekipe të mëdha, ndër më të mirat në botë. Nuk kemi frikë dhe besojmë në mundësitë tona”, ka deklaruar Yamal.
Edhe trajneri Luis de la Fuente ka vlerësuar forcën e Francës, por beson se Spanja mund të mposhtë çdo kundërshtar.
“Ne kemi respekt maksimal për Francën, por ndihemi të aftë për të mposhtur çdo ekip. E dimë potencialin e tyre, por gjithashtu e dimë se kemi fituar ndaj tyre në dy gjysmëfinale”, është shprehur De la Fuente.
Franca, ndërkohë, synon finalen e tretë radhazi të Botërorit dhe një tjetër trofe nën drejtimin e Deschampsit, i cili do të largohet nga posti pas përfundimit të turneut.
Me kualifikimin në katërshen e fundit, Franca është bërë vetëm kombëtarja e tretë në histori që arrin tri gjysmëfinale radhazi të Kupës së Botës, pas Gjermanisë dhe Brazilit.
Deschamps ka minimizuar meritat personale për sukseset e Francës, duke ia atribuar rezultatet cilësisë së lojtarëve dhe unitetit brenda skuadrës.
Fituesi i kësaj sfide do të sigurojë biletën për finalen e 19 korrikut, ku do të përballet me fituesin e gjysmëfinales tjetër mes Argjentinës dhe Anglisë
