Nëse do t’u besohet rrjeteve sociale, Argjentina po hyn në fazën gjysmëfinale të Kupës së Botës me “gjithë botën kundër saj”.
Shprehja është kthyer në një nga memet më të përdorura të këtij turneu, me mijëra postime që sillen rreth fjalës “urrejtje”. Tifozët e futbollit kanë popullarizuar edhe termin “hate-watching Argentina”, pra ndjekjen e ndeshjeve të Argjentinës vetëm për kënaqësinë e talljes, kritikimit apo dëshirës për ta parë kampionen në fuqi të eliminohet, shkruan The Telegraph,
Disa përdorues të rrjeteve sociale kanë vënë re se kombinimi i fjalëve “Argentina” dhe “hate” në një postim shpesh sjell qindra apo mijëra reagime.
“E gjithë bota e urren Argjentinën”, shkruante një postim viral. Një tjetër pretendonte: “LAJM I FUNDIT: Argjentina është aktualisht vendi më i urryer në botë”.
Një përdorues pyeste: “Pse çdo postim kundër Messit apo Argjentinës merr mbi 50 mijë pëlqime, pavarësisht sa i pakuptimtë apo irracional është?”, ndërsa një tjetër deklaronte: “Urrejtja ndaj Messit dhe Argjentinës po arrin nivele ekstreme”.
Si u kthye Argjentina në “fqinjin e keq” të futbollit botëror?
Në sport, suksesi zakonisht sjell admirues. Por në rastin e Argjentinës, çdo fitore në këtë Botëror duket se ka shkaktuar një valë të re kritikash, memesh dhe debatesh online.
Për dekada me radhë, Argjentina ka qenë një nga kombëtaret më të adhuruara në futbollin botëror. Triumfi i Lionel Messit në Kupën e Botës 2022 në Katar e afroi atë me miliona tifozë në mbarë botën dhe forcoi statusin e tij si një nga lojtarët më të mëdhenj të historisë.
Por katër vite më vonë, atmosfera në internet duket shumë më ndryshe.
Që nga Botërori i Katarit, tensionet gjeopolitike, rritja e nacionalizmit dhe ndarjet e thella në diskutimet online kanë bërë që sporti dhe politika të përzihen gjithnjë e më shumë. Konfliktet në Gaza, Ukrainë dhe së fundmi në Iran janë futur edhe në bisedat për futbollin, duke e kthyer Kupën e Botës në një arenë ku përplasen edhe çështje jashtë fushës.
Edhe Messi është kthyer në objektiv kritikash
As Lionel Messi nuk i ka shpëtuar sulmeve online.
“E gjithë bota e di që Messi është i përkëdheluri i FIFA-s”, shkruante një koment viral, ndërsa një tjetër përdorues ironizonte: “Gjërat që të bezdisin tani: të jesh tifoz i Argjentinës”.
Talljet ndaj ekipit argjentinas kanë marrë forma gjithnjë e më teatrale.
“Edhe nëse Argjentina do të luante vetëm në stadium, unë do të mbështesja stadiumin”, shkruante një tifoz në mënyrë ironike.
Një tjetër komentonte: “Urrejtja ndaj Argjentinës ka dalë jashtë kontrollit. Disa njerëz po punojnë si në një orar 9 me 5 vetëm duke shpresuar për dështimin e tyre. E urreni Argjentinën më shumë sesa doni ekipin tuaj. Messi jeton në mendjet e disa prej jush pa paguar qira”.
Përtej futbollit, debatet rreth Argjentinës janë zgjeruar
Përtej rezultateve sportive, Argjentina ka prej kohësh një rol të veçantë në Amerikën e Jugut.
Identiteti i saj i lidhur me emigracionin evropian dhe historia komplekse sa i përket komuniteteve indigjene dhe afro-argjentinase shpesh rikthehen në diskutime gjatë turneve të mëdha.
Kohët e fundit, disa përdorues të rrjeteve sociale kanë lidhur Argjentinën edhe me polemika më të gjera politike. Vizitat e Messit në Jerusalem dhe takimet e tij me liderë izraelitë janë rikthyer në vëmendje, ndërsa një imazh viral që shfaqte Benjamin Netanyahun me fanellë të Argjentinës shkaktoi reagime të shumta, pavarësisht raportimeve se fotografia ishte krijuar me inteligjencë artificiale.
Polemikat u shfaqën edhe jashtë internetit
Eliminimi i Egjiptit solli një tjetër valë debatesh. Trajneri i Egjiptit, Hossam Hassan, reagoi ashpër pas ndeshjes duke bërë një gjest me duar në formë “X”, sinjal që FIFA e përdor për të treguar kundërshtimin ndaj racizmit.
Ndeshja u kthye në një nga më të diskutuarat e turneut, ndërsa disa video të Messit vazhduan të analizohen në rrjete sociale për pretendime rreth gjesteve të mundshme raciste.
Disa tifozë egjiptianë u shfaqën duke djegur fanella të Messit, ndërsa të tjerë i përdorën ato si tapete pas eliminimit të skuadrës së tyre.
Argjentina, protagoniste e një lufte online
Kritikat ndaj Argjentinës nuk kanë mbetur vetëm në sferën sportive.
Disa postime kanë kaluar në debate gjeopolitike, me komente si “Argjentina është Izraeli i Amerikës Latine”, ndërsa të tjerë e kanë paraqitur suksesin e saj në turne si një triumf përballë një bote që e kundërshton.
“Argjentina mbërriti në gjysmëfinale edhe pse e gjithë bota e urren”, thuhej në një postim që u kthye në një nga memet më të shpërndara të turneut.
Nëse matet vetëm nga reagimet në internet, Argjentina ka kaluar nga një prej ekipeve më të dashura në një nga “keqbërësit” më të mëdhenj të futbollit modern. Dhe sa më shumë fiton, aq më shumë duket se rritet vala e kritikave ndaj saj.
