Vinícius Júnior e ka ftuar Erling Haalandin t’i bashkohet në pushime, ndërsa ylli i Real Madridit dhe i Brazilit po kalon disa ditë në shoqërinë e aktorit amerikan Terry Crews.
Sulmuesi brazilian publikoi të premten disa fotografi me aktorin e njohur në rrjetet sociale, duke i shoqëruar me një mesazh për sulmuesin e Manchester Cityt: “Po të presim, Erling”.
Vinícius po shijon disa ditë pushimi në qytetin e tij të lindjes, Rio de Janeiro, përpara se t’i bashkohet Real Madridit për përgatitjet para sezonit të ri.
Në një nga fotografitë ai shihet mbi shpinën e Terry Crews, ndërsa në të tjera të dy stërviten me pesha dhe vizitojnë dhomën e trofeve të aktorit, ku Vinícius i prezantoi edhe disa anëtarë të familjes së tij.
Lidhja mes Viníciusit, Haalandit dhe Terry Crews lindi nga një meme që u bë virale gjatë Kupës së Botës. Inteligjenca artificiale i vendosi brazilianin dhe norvegjezin në një nga skenat më të famshme të filmit “White Chicks”, ku luante edhe vetë Crews.
Vinícius ishte pjesë e Brazilit në Kupën e Botës, ku shkëlqeu me katër gola në fazën e grupeve.
Megjithatë, “Seleção” u eliminua në fazën e 1/8 së finales nga Norvegjia, me Haalandin që realizoi dy gola në fitoren 2-1 të ekipit të tij.
Një nga momentet më të veçanta të asaj ndeshjeje ishte përqafimi mes Viníciusit dhe Haalandit në zonën miks të stadiumit “MetLife” në New Jersey.
Vinícius ka qenë shpesh në qendër të vëmendjes javët e fundit, fillimisht për ndryshimin e dukshëm në pamjen e tij, që sipas raportimeve lidhet me ndërhyrje estetike, dhe më pas për ndërveprimet e vazhdueshme në rrjetet sociale me influencuesen braziliane Virginia Fonseca.
Çifti kishte njoftuar ndarjen më 15 maj, në prag të Kupës së Botës, por fotografitë dhe publikimet e fundit kanë shtuar spekulimet se ata janë ribashkuar.
