Liverpooli raportohet se është i gatshëm të lejojë largimin e një lojtari të rëndësishëm për të siguruar transferimin e sulmuesit të PSG-së, Bradley Barcola.
Pavarësisht interesimit të Arsenalit, Liverpooli duket favorit për të nënshkruar me yllin e PSG-së dhe të Francës gjatë afatit kalimtar veror.
Megjithatë, “The Reds” mund të detyrohen të thyejnë rekordin e tyre të transferimeve, pasi klubi francez kërkon 145 milionë funte për të dhënë dritën jeshile për shitjen e tij.
Klubi nga Merseyside thuhet se ka zhvilluar bisedime me PSG-në për transferimin e Barcolas, të cilin e sheh si zëvendësuesin ideal të Mohamed Salahut në krah.
Barcola është i hapur për këtë transferim dhe i ka dhënë përparësi Liverpoolit, ndërsa klubi anglez pret detaje të mëtejshme për çmimin final dhe pagën e lojtarit.
23-vjeçari, i cili shënoi tri gola në tetë paraqitje në Kupën e Botës së fundit, iu bashkua PSG-së nga Lyoni në vitin 2023.
Që atëherë ai ka regjistruar 39 gola dhe 37 asistime në 152 ndeshje, duke ndihmuar skuadrën e Luis Enriques të fitojë tri tituj të Ligue 1, dy Kupa të Francës dhe dy tituj radhazi në Ligën e Kampionëve në vitet 2025 dhe 2026.
Megjithatë, Barcola nuk ka qenë gjithmonë titullar i padiskutueshëm, pasi Khvicha Kvaratskhelia dhe Désiré Doué janë preferuar shpesh në krahë.
Ardhja e mundshme e Barcolas pritet të sjellë largimin e një lojtari aktual të Liverpoolit. Edhe pse Federico Chiesa është përfolur shumë për një largim, duket se ai mund të qëndrojë në “Anfield”, pasi synon të nisë një “kapitull të ri” nën drejtimin e trajnerit të ri, Andoni Iraola.
“Është gjithmonë një fillim i ri në fillim të sezonit”, tha Chiesa pasi shënoi në fitoren 4-2 të Liverpoolit ndaj Sunderlandit në një ndeshje miqësore në Nashville të dielën (26 korrik).
“Ndoshta për mua ka pasur shumë fillime të reja. Por nuk më intereson, unë thjesht po përpiqem të jap më të mirën për këtë trajner të ri.
“Edhe sezonin e kaluar nën drejtimin e Arne Slot u përpoqa të jap maksimumin. E ndjeja se isha gati për një rol më të madh, por më pas varej nga trajneri nëse donte të më aktivizonte apo jo. Sigurisht që doja të luaja më shumë, por kështu është futbolli. Trajneri kishte planet e tij dhe mori vendimet e tij. Nuk kam çfarë të them për këtë. Këtë vit mund ta quajmë një kapitull të ri. Ka një trajner të ri dhe duhet të përqendrohem tek ai.”
Megjithatë, Cody Gakpo mund të jetë ai që do të shtyhet drejt largimit. Sipas “Onze Mondial”, të cituar nga “Get French Football News”, reprezentuesi i Holandës mund të largohet, pavarësisht se verën e kaluar rinovoi kontratën me Liverpoolin deri në vitin 2030.
Tottenhami është mes disa klubeve që po e ndjekin nga afër 27-vjeçarin, i cili sezonin e kaluar regjistroi shtatë gola dhe pesë asistime në 36 paraqitje nën drejtimin e Arne Slot.
Ende nuk është e qartë nëse Gakpo do të jetë i gatshëm të largohet nga Liverpooli, pasi i kanë mbetur edhe katër vite kontratë.
Liverpooli raportohet se e vlerëson 27-vjeçarin me rreth 60-70 milionë funte.
