Presidenti i FIFA-s, Gianni Infantino, thuhet se i ka ofruar Marokut të drejtën për të organizuar finalen e Kupës së Botës 2030 në këmbim të mbështetjes publike të Federatës Mbretërore Marokene të Futbollit, mes presionit në rritje që po përballet në krye të qeverisë botërore të futbollit.
Sipas gazetarit Martyn Ziegler të The Times, Infantino ndodhet në një situatë të vështirë pasi disa federata kanë nisur të tërheqin mbështetjen ndaj tij pas polemikave të krijuara nga propozimi “FIFA Forward Enterprise”.
Uellsi ishte federata e parë që e bëri publike largimin e mbështetjes, ndërsa më pas të njëjtin qëndrim e morën edhe Serbia dhe Suedia. Raportimet sugjerojnë se edhe Anglia mund të ndjekë të njëjtën rrugë.
Për këtë arsye, Infantino zhvilloi një takim urgjent me drejtues të lartë të FIFA-s në Rabat, ku organizata hapi një zyrë të re në vitin 2025. Gjatë kësaj periudhe, sipas raportit, ai i ka propozuar Marokut organizimin e finales së Botërorit 2030, turne që do të zhvillohet kryesisht në Spanjë, Portugali dhe Marok.
Në këmbim, presidenti i FIFA-s kërkon që Maroku të dalë publikisht në mbështetje të tij, duke iu bashkuar vendeve si Indonezia, e cila tashmë ka shprehur përkrahjen.
Megjithatë, kjo ide mund të përballet me kundërshtime. Presidenti i Federatës Spanjolle të Futbollit, Rafael Louzán, kishte deklaruar në muajin qershor se Spanja duhet të presë finalen e Kupës së Botës 2030, duke theksuar se nuk sheh asnjë arsye pse ndeshja më e madhe e turneut të zhvillohet diku tjetër.
Raporti shton se Infantino po kërkon gjithashtu mbështetjen e Arabisë Saudite, organizatore e Botërorit 2034, por deri më tani autoritetet saudite nuk kanë dalë me një deklaratë publike në favor të tij.
Ndërkohë, edhe figura të njohura të futbollit kanë nisur të distancohen nga presidenti i FIFA-s. Ish-legjenda portugeze, Luis Figo, i cili ka qenë ambasador i FIFA-s, kërkoi publikisht dorëheqjen e Infantinos, duke e akuzuar atë se ka dëmtuar reputacionin e institucionit dhe interesat e futbollit.
Sipas burimeve të The Times, mungesa e mbështetjes publike nga ish-futbollistët e njohur është një tjetër shqetësim për Infantinon, pasi FIFA po kërkon figura me ndikim që ta mbështesin në këtë periudhë të trazuar.
