Ukraina beson se Rusia po planifikon të rekrutojë edhe 300 mijë trupa të tjerë për luftën në Ukrainë, pas zgjedhjeve parlamentare ruse në mesin e shtatorit, deklaroi presidenti ukrainas Volodymyr Zelensky.
Forcat ruse po vijojnë përpjekjet për të pushtuar pjesën e mbetur të rajonit industrial të Donbasit, në lindje të Ukrainës, ku trupat e Moskës kanë avancuar gradualisht, por sipas Kievit, me kosto të lartë në njerëz.
Në deklaratat e bëra për gazetarët dhe të publikuara të dielën, Zelensky tha se Rusia mund të rekrutojë trupa të tjerë gjatë vitit 2027, me synimin për të arritur një total prej rreth 500 mijë ushtarësh. Ai e përshkroi këtë si një lloj “mobilizimi periferik”, që do të përqendrohej kryesisht në rajonet e largëta të Rusisë.
“Ne besojmë se kjo nuk do të ndodhë në qytetet qendrore”, tha Zelensky. “Por nuk mendoj se do të jenë në gjendje ta fshehin shumë mirë.”
Zgjedhjet parlamentare në Rusi janë planifikuar të zhvillohen nga 18 deri më 20 shtator.
Ndërsa luftimet vazhdojnë rreth qytetit strategjik të Kostjantinivkës, Zelensky tha se Rusia po pëson humbje shumë të mëdha në përpjekjet për të avancuar drejt të ashtuquajturës “brez i fortesave” të qyteteve të Ukrainës lindore.
Ai gjithashtu përshëndeti përparimet e fundit të trupave ukrainase në juglindje të vendit, duke shtuar se territori i pushtuar nga Rusia dhe ai i çliruar nga forcat ukrainase gjatë vitit 2026 pritet të jenë afërsisht të barabarta.
