Media lokale “Kontakt Plus” raporton se sot në Lagjen e Boshnjakëve në Mitrovicë të Veriut janë shembur disa ndërtesa përballë tregut “Emona”. Inspektorati i kësaj komune ka urdhëruar pezullimin e punimeve, meqë pretendohet se leja për rrënim e lëshuar më parë kishte skaduar më 18 gusht 2025 dhe se kontraktori nuk e kishte rinovuar lejen për prishjen e ndërtesave që ndodheshin në pronën e komunës.
Komuna gjithashtu ka paralajmëuar për ndjekje penale për shkak të dyshimeve për parregullsi procedurale.
Siç shkruan “Kontakt Plus”, në terren ka pasur mosmarrëveshje në mes të zyrtarëve komunalë dhe Policisë së Kosovës dhe se disa zyrtarë të komunës janë në stacionin e Policisë.
Komuna pretendon se policia, në vend që t’u ofronte ndihmë zyrtarëve komunalë, pengoi veprimet e tyre dhe i çoi ata në stacionin e policisë.
Policia e Kosovës nuk i konfirmoi Kontakt Plus se i kishte ofruar ndihmë ndonjë pale. Fillimisht, policia deklaroi se ende po përcaktonte rrethanat e ngjarjes, ndërsa zëvendëskomandanti i Policisë së Kosovës për rajonin e Veriut, Veton Elshani, konfirmoi se zyrtarët komunalë janë në stacionin e policisë, ku po intervistohen.
