Tre organizatat kryesore përfaqësuese të sistemit të drejtësisë: Shoqata Kombëtare e Gjyqtarëve, Unioni i Gjyqtarëve dhe Shoqata e Prokurorëve të Republikës së Shqipërisë kanë paraqitur në Gjykatën Kushtetuese një tjetër padi kundër ligjit për pagat e magjistratëve të miratuar 3 ditë më parë në Parlament.
Kërkesë ka si objekt shfuqizimin e plotë si antikushtetues të Ligjit nr. 95/2026 (datë 18.09.2026), si dhe pezullimin e menjëhershëm të zbatimit të tij deri në marrjen e vendimit përfundimtar nga Gjykata Kushtetuese
Thelbi i pretendimeve dhe argumenteve kryesore:
Vendosja e formulës antikushtetuese të pagës dhe anashkalimi i vendimeve kushtetuese:
Ligji nr. 95/2026 e lidh pagën referuese bazë të magjistratit me pagën e Presidentit të Republikës sipas koeficientit 0.38.
Kërkuesit argumentojnë se kjo formulë riprodhon “uljen e fshehtë” dhe ngrirjen e pagave, duke sfiduar dhe tentuar të neutralizojë Vendimin nr. 15/2026 të Gjykatës Kushtetuese. Sipas atij vendimi, meqenëse Kuvendi nuk miratoi ndryshimet brenda afatit detyrues të 31 korrikut 2026, u aktivizua drejtpërdrejt formula me referencë te funksionari i administratës së lartë publike.
Fuqia prapavepruese dhe pasiguria juridike:
Ligji i shtrin efektet e tij financiare prapaveprueshëm që nga 1 prilli 2023.
Kjo prapaveprimtari çon në rillogaritje në ulje të pagave, krijimin e diferencave debitore, prekjen e të drejtave të fituara dhe cenimin e sigurisë juridike për të gjithë magjistratët.
Cenimi i pavarësisë së gjyqësorit dhe ndarjes së pushteteve:
Paga e magjistratit garantohet nga neni 138 i Kushtetutës si një garanci materiale e pavarësisë së pushtetit gjyqësor.
Kuvendi po përdor pushtetin ligjvënës për të neutralizuar pasojat e mosveprimit të tij në kohë dhe për të ndikuar me efekt prapaveprues mbi proceset gjyqësore administrative që janë aktualisht në zhvillim kundër Ministrisë së Financave e Thesarit.
Cenimi i gjerë i të gjithë piramidës së drejtësisë:
Paga e magjistratit shërben si bazë referuese ligjore edhe për pagat e hetuesve të BKH-së, Oficerëve të Policisë Gjyqësore, këshilltarëve ligjorë të Gjykatës së Lartë e Kushtetuese, si dhe administratës gjyqësore. Ligji i ri ndërpret këtë lidhje dhe krijon fragmentim, pasiguri e pabarazi financiare në të gjithë sistemin.
Shkelja e procedurës parlamentare e dëgjimore:
Ligji u miratua pa një proces konsultimi real, transparent dhe efektiv. Shoqatat përfaqësuese u njoftuan për të marrë pjesë në dëgjesat e komisioneve parlamentare vetëm pak minuta përpara zhvillimit të tyre më 15 shtator 2026, duke pamundësuar një debat substancial.
