Shefi i UNMIK’ut në Kosovë, Peter Due, ka takuar ministrin e Jashtëm serb, Marko Gjuriq, dhe Petar Petkoviqin, takim i cili është zhvilluar para seancës së Këshillit të Sigurimit të OKB-së për Kosovën, që do të mbahet në tetor.
Në njoftimin e UNMIK’ut, bëhet e ditur se gjatë takimit është diskutuar për zhvillimet e fundit dhe rëndësinë e dialogut.
‘’Në prag të seancës së Këshillit të Sigurimit të OKB-së për Kosovën, që do të mbahet në tetor, Përfaqësuesi Special i Sekretarit të Përgjithshëm (SRSG), Peter Due, vizitoi Beogradin.
Ai u takua me ministrin e Punëve të Jashtme, Marko Gjuriq, drejtorin e Zyrës për Kosovën dhe Metohinë, Petar Petkoviq, si dhe me përfaqësues të komunitetit diplomatik, me të cilët shkëmbeu pikëpamje për zhvillimet e fundit, rëndësinë e dialogut dhe punën e vazhdueshme të UNMIK-ut, përfshirë përpjekjet për ndërtimin e besimit ndërmjet të gjitha komuniteteve në Kosovë’’, thuhet në komunikatën e UNMIK’ut.
