E ardhmja e Neymarit në futbollin profesionist mund të mos zgjasë edhe shumë.
Sulmuesi brazilian ka lënë të kuptohet se viti 2030 mund të jetë momenti kur do t’i japë fund karrierës në futbollin tradicional, për t’iu bashkuar më pas Kings League.
Gjatë një bisede me Cris Guedes, bashkëdrejtuesin e ekipit Furia, Neymar deklaroi se dëshiron të luajë në këtë garë në vitin 2030.
Kur iu tha se atëherë do të ishte ende në një moshë relativisht të mirë për futbollin, ai iu referua problemeve fizike: “Nëse do ta kishe gjurin tim, do të më kuptoje”.
Deklarata vjen në një periudhë kur 34-vjeçari po përballet sërish me probleme fizike.
Ai aktualisht është jashtë fushave për shkak të një dëmtimi muskulor në kofshën e djathtë dhe ende nuk ka një datë të saktë për rikthimin.
Megjithatë, Neymar më vonë sqaroi se është i lumtur te Santosi dhe se dëshiron të vazhdojë të luajë për klubin brazilian.
Për momentin, ideja e tij për Kings League mbetet një plan për të ardhmen, jo një vendim zyrtar për pensionimin.
