“Ukraina ka pak më shumë se 30 ditë luftime përpara se moti të fillojë të pengojë seriozisht kundërsulmimin e saj”, tha gjenerali amerikan Mark Milley në një intervistë për BBC.
Shefi i Shtabit të Përbashkët të Ushtrisë Amerikane Milley komenton shpesh në media ngjarjet në vijën e parë të frontit dhe në intervistën e fundit ai vlerësoi se kushtet e ftohta do ta vështirësojnë ndjeshëm ecurinë e Ukrainës.
Gjenerali i lartë amerikan beson se është shumë herët për të thënë nëse kundërsulmi ka dështuar, por tha se Ukraina “po përparon me një ritëm shumë të qëndrueshëm nëpër linjat e frontit rus”.
“Ka ende kohë, ndoshta rreth 30 deri në 45 ditë luftime në varësi të motit, kështu që ukrainasit nuk kanë mbaruar. Ka beteja të papërfunduara, ata nuk e kanë përfunduar atë që po përpiqen të arrijnë”, tha Milley.
Ministri estonez i Mbrojtjes paralajmëroi gjithashtu pak ditë më parë se kundërofensiva ukrainase po përballet me presionin e motit për shkak të afrimit të dimrit.
“Problemi për ukrainasit është se ata kanë katër deri në shtatë javë, në varësi të natyrës. Pas kësaj, ka të ngjarë të shohim më pak lëvizje. Duhet të pranojmë se koha luan një rol të madh në kundërsulm”, tha ministri Hanno Pevkur në një konferencë shtypi në Talin.
E pajisur me armë perëndimore me vlerë miliarda euro, Ukraina nisi një ofensivë ushtarake kundër forcave ruse në qershor me synimin për të çliruar territorin e pushtuar.
Megjithatë, përballë një mbrojtjeje të fortë ruse forcat e armatosura të Ukrainës kanë arritur deri më tani vetëm një sukses të kufizuar. Progresi ka qenë i ngadalshëm dhe ka të ngjarë të jetë edhe më i ngadalshëm gjatë kushteve të motit të lagësht, me baltë dhe të ftohtë.
