Drita e Gjilanit është kampione e Kosovës në volejboll në konkurrencë të femrave, duke mposhtur në seri 3:1 Skenderajn.
Fitorja vendimtare e Dritës u arrit në Skenderaj, në një ambient të bukur sportiv, në palestrën e mbushur me shikues
Drita fitoi bindshëm ndaj Skenderajt me rezultatin 3:0 në sete.
Skenderaj shfaqi pak në këtë ndeshje, ndërsa vajzave drenicase nuk u kreu punë as përkrahja e madhe nga tribunat.
Seti i parë përfundoi 25:17. Në setin e dytë Skenderaj u angazhua më shumë, por jo mjaftueshëm sa për të barazuar rezultatin, pasi ky set u mbyll 25:23 në të mirë të Dritës
Ndërkohë në setin e tretë gjilanaset dominuan plotësisht, duke fituar 25:18.
Drita në fakt vetëm ka vazhduar dominimin në volejbollin kosovar, pasi ka mbrojtur titullin e kampionit
Për Dritën është titulli i tetë dhe i katërti rresht, ndërsa ka edhe tetë kupa të Kosovës.
