Ministria e Arsimit, Shkencës, Teknologjisë dhe Inovacionit, ka njoftuar se maturantët e Kosovës do t’i nënshtrohen Provimit të Maturës Shtetërore këtë të shtunë, 24 qershor.
Në njoftimin e MaShT-it thuhet se “janë realizuar të gjitha përgatitjet e duhura, në koordinim me Drejtoritë Komunale të Arsimit dhe shkollat, për organizimin e këtij provimi”.
Në çdo bankë do të sistemohet nga një nxënës, ndërsa në çdo klasë do të lejohen më së shumti 15 maturantë.
“Çfarëdo parregullsie eventuale në qendrën e testimit, të raportohet me shkrim në DKA dhe në MAShTI. Ndërsa, ndaj të gjithë personave të angazhuar në proces, të cilët nuk i realizojnë detyrat e caktuara me kompetencë dhe profesionalizëm të lartë, do të kërkohet përgjegjësi”, thuhet në njoftim.
“Testi do të organizohet në 178 qendra të testimit. Këtë vit, në sallën e testimit (klasat) përveç administruesve do të jetë edhe një mbikëqyrës (student absolvent ose i nivelit master). Për të mos ndikuar në proces dhe sipas rregullave të administrimit të testit, pas orës 10:00 (koha kur fillon testi) nuk lejohet asnjë person tjetër brenda qendrave të testimit përveç personave përgjegjës për mbarëvajtje të testit”, përmbyllet njoftimi.
