Ministrja e Arsimit, Arbërie Nagavci, ka thënë se vendimi që mjetet për blerjen e teksteve shkollore t’u barten prindërve është bërë në mënyrë që buxheti i shtetit të mos keqpërdoret.
Ajo në një intervistë dhënë të mërkurën bëri të ditur se nxënësve nga klasa e 1 deri 5 do t’u ndahen nga 80 euro, (50 për tekste dhe 30 për mjetet mësimore), ndërkaq shumën prej 30 eurove do ta marrin edhe nxënësit e klasave 6 deri 9.
Më tej ministrja Nagavci bëri të ditur se do të kujdesen që ekzekutimi i parave në llogaritë e prindërve të bëhet para datës 1 shtator.
“Deri më tani kemi më shumë se 80 mijë aplikime i kemi marrë listat me të gjitha dhënat e aplikuesve nga ASHI-ja dhe besoj që gjatë ditës do ti përcjellim të gjitha në Ministrinë e Financave në mënyrë që të sigurohemi që ekzekutimi i mjeteve të bëhet para datës 1 shtator”, tha ajo.
E para e MASHTI-t pati edhe një apel për prindërit që të mos nxitohen me blerjen e teksteve shkollore pa pranuar listën e tyre na ana e mësimdhënësve ose shkollave.
“Secili prej prindërve duhet të marrë listën me tekste që duhet të përdoren nga ana e shkollave dhe mësimdhënësve. Ne kemi dërguar në drejtoritë komunale të arsimit një qarkore që kemi kërkuar që lista e teksteve të miratuara të bëhet publike në vendet e dukshme të shkollës, dhe mësimdhënësit ti ndajnë informatat me prindërit”, tha Nagavci.
Ministrja foli edhe për ankesat e prindërve për çmimin e disa librave, si dhe për raportin që ka me shtëpinë botuese “Albas”.
Sipas Nagavcit, shtëpitë botuese duhet të shesin tekste për të cilat i kanë vendimet nga ana e Ministrisë.
Ministrja shtoi se çdo rritje e çmimit çdo abuzim do ta adresojnë tek Autoriteti i Konkurrencës. E pyetur nëse ka pas përkrahje nga ana e saj për shtëpinë botuese “Albas”, ajo u shpreh kategorike “jo”.
E sa i përket çështjes se nëse një prind nuk ia blenë librat shkollor fëmijës së tij, ministrja theksoi se “është e papranueshme se me sa lehtësi individë të caktuar të opozitës i konsiderojnë si keqbërës e të paditur shumicën e prindërve”.
Nagavci u është përgjigjur edhe kritikave ndaj saj nga ana e SBASHK-ut. Ajo thotë se vendimi është në të mirë të punëtorëve që SBASHK-u i përfaqëson.
Kryetari i SBASHK-ut, Rrahman Jasharaj e ka quajtur eksperiment të gabuar, vendimin e MASHTI-t që blerja e teksteve shkollore nga ana e prindërve.
Për deklarata të tilla dhe shumë të tjera, Nagavci ka thënë se “unë nuk e kuptoj interesat e kujt i përfaqëson zoti Jasharaj. Është angazhim yni për të përmirësuar cilësinë”.
Ministrja më tej shton se “për SBASHK-un ky vendim yni duhet të jetë i mirëpritur”.
