Deçan, Maj 2025 – Ish-luftëtari i UÇK-së dhe zyrtari për një kohë të gjatë i Aleancës për Ardhmërinë e Kosovës, Shkumbin Demaliaj, i cili aktualisht udhëheq Iniciativën Qytetare “Demokracia”, ka dalë me një reagim të ashpër në drejtim të udhëheqjes komunale në Deçan, duke akuzuar atë për keqmenaxhim flagrant dhe abuzim me financat publike.
Në një shkrim të publikuar në profilin e tij në Facebook, Demaliaj ka prezantuar të dhëna të detajuara të raportit financiar të tremujorit të parë të vitit 2025 (janar-mars), të cilat, sipas tij, zbulojnë një keqpërdorim shqetësues të buxhetit komunal.
Demaliaj: “Buxheti për projektet kapitale pothuajse u shpenzua brenda 90 ditësh”
Sipas Demaliajt, deri më 30 mars 2025, janë shpenzuar plot 94.63% e buxhetit për projektet kapitale, duke lënë vetëm 5.37% ose rreth 159 mijë euro për pjesën tjetër të vitit. Ai e quan këtë veprim “të papërgjegjshëm dhe të papranueshëm”, duke akuzuar qeverinë lokale se po nënshkruan kontrata miliona euro në funksion të fushatës zgjedhore.
Ai përmendi konkretisht një kontratë për asfaltim me vlerë prej 5.85 milionë euro të nënshkruar më 17 prill, duke e quajtur “të pamoralshme” në një kohë kur buxheti për projektet kapitale është pothuajse i shterur.
Shifra shqetësuese sipas raportit financiar:
3.1 milionë euro për përmbarime dhe gjykata
132,824 euro për naftë për automjete dhe ngrohje brenda 3 muajsh
51,914 euro për dreka zyrtare dhe ushqim & pije – mesatarisht 560 euro në ditë
116,191 euro për shërbime këshillëdhënëse dhe kontraktuale
84,732 euro për furnizime për zyre në vetëm një tremujor
Demaliaj ironizoi edhe me faktin se Drejtoria për Buxhet dhe Financa ka krijuar kode të ndara për “dreka zyrtare” dhe “ushqim & pije”, duke e interpretuar këtë si përpjekje për të kamufluar vlerën e lartë të shpenzimeve.
Pyetje publike për Komunën
Në reagimin e tij, Demaliaj renditi disa pyetje drejtuar komunës, duke kërkuar transparencë për përfituesit e shumave marramendëse të përmbarimeve dhe shpjegime se si janë justifikuar shpenzime të tilla në një periudhë kaq të shkurtër. Ai akuzoi drejtuesit komunalë se e kanë trajtuar buxhetin si “mjet elektoral” dhe paralajmëroi qytetarët për borxhe të mundshme që do t’i rëndojnë për vite me radhë.
Ftesë për auditim dhe vetëdijesim qytetar
Në përmbyllje, Demaliaj apeloi për veprim nga auditori dhe shprehu shqetësim për mungesën e fondeve për pjesën tjetër të vitit, përfshirë edhe përballjen me zgjedhjet lokale që pritet të mbahen në vjeshtë. Ai u zotua se do të vazhdojë të mbajë qytetarët të informuar dhe të luftojë për transparencë dhe llogaridhënie.
Reagimi i plotë është i publikuar në faqen zyrtare të Shkumbin Demaliajt në Facebook.
