Presidentja e Kosovës, Vjosa Osmani, ka ftuar liderët e partive politike në një takim të rëndësishëm, pas dështimit të konstituimit të Kuvendit të Kosovës. Takimi është planifikuar të mbahet të enjten, më 15 maj, në orën 13:00, me synimin për të diskutuar rrugëdaljet nga kriza aktuale.
Konfirmimi i pjesëmarrjes në këtë takim tashmë ka ardhur nga Partia Demokratike e Kosovës (PDK). Zëdhënësi i PDK-së, Faton Abdullahu, ka bërë të ditur se kryetari i partisë, Memli Krasniqi, do t’i përgjigjet pozitivisht ftesës së Presidentes.
“Po, kryetari Memli Krasniqi ka pranuar ftesën për takim nga Presidentja Vjosa Osmani. Na vjen mirë që, ashtu siç ka propozuar PDK, po ndërmerren hapa institucionalë që shpresojmë se mund të jenë ndihmues për të dalë nga kriza politike dhe për të hapur rrugën drejt krijimit të institucioneve të reja,” ka deklaruar Abdullahu.
Ai ka theksuar nevojën e menjëhershme për institucione të reja në Kosovë dhe shpreson që të gjitha partitë politike të marrin pjesë në takim me konstruktivitet dhe fokus në interesat e qytetarëve.
Ky takim vjen në një kohë kur situata politike në vend kërkon dialog dhe bashkëpunim për të zgjidhur çështjet e ngritura, duke i hapur rrugë një qeverisjeje funksionale dhe stabile. Mbetet për t’u parë nëse ky hap do të ndihmojë në tejkalimin e bllokadës institucionale.
