Përplasja ndërmjet Komunës së Prishtinës dhe Institutit për Mbrojtjen e Trashëgimisë Kulturore (IMTK) ka marrë edhe një tjetër kthesë të tensionuar, pasi sot inspektorët e IMTK-së, të shoqëruar nga Policia e Kosovës, ndërprenë punimet në sheshin “George Bush”, duke vendosur bllokimin e plotë të tyre.
IMTK deklaron se punimet e nisura nga Komuna e Prishtinës po zhvillohen në një zonë të mbrojtur të trashëgimisë kulturore dhe për këtë arsye konsideron se janë të paligjshme, pasi – sipas tyre – mungon leja përkatëse për ndërhyrje në atë hapësirë. Nga ana tjetër, Komuna e Prishtinës mohon të ketë pasur ndonjë vendim zyrtar që ndalon punimet dhe akuzon institucionet qendrore për ndërhyrje politike.
Drejtori i Infrastrukturës në Komunën e Prishtinës, Sokol Havolli, ka reaguar ashpër ndaj këtij vendimi, duke e cilësuar këtë veprim si një akt të imponuar politikisht dhe pa bazë ligjore. Në një postim në rrjetet sociale, ai shprehet se Kosova po kalon nga “shtet ligjor në shtet policor”.
“Inspektorët e Ministrisë së Kulturës, me urdhra politik dhe pa asnjë bazë ligjore, bllokuan edhe një punishte në Kryeqytet. Kërkova vendimin e Ministrit për asetet në mbrojtje – nuk ekziston. Kërkova edhe sqarim pse nuk janë të regjistruara në sistemet që përdorin Komunat – asnjë përgjigje”, ka shkruar Havolli, duke theksuar se inspektorët po zbatojnë urdhra politikë dhe po abuzojnë me autoritetin policor.
Kjo nuk është përplasja e parë mes këtyre dy institucioneve, por tanimë situata po merr përmasa më të ashpra, duke përfshirë edhe forcat e rendit në terren dhe duke ngritur pyetje të reja për koordinimin ndërinstitucional dhe respektimin e ligjshmërisë.
Komuna ka bërë të ditur se nuk do të ndalet me projektet infrastrukturore në Prishtinë dhe do të kërkojë sqarime ligjore për ndalimin e punimeve, ndërsa nga IMTK nuk ka ende një komunikatë zyrtare shtesë pas ndërhyrjes së sotme.
Në pritje të zhvillimeve të mëtejme, qytetarët mbeten dëshmitarë të një përplasjeje që gjithnjë e më shumë po kalon nga teknike në politike – dhe që rrezikon të zvarritë edhe më tej projektet publike në zemër të kryeqytetit.
