Para fillimit të seancës së 22-të konstituive të Kuvendit të Kosovës, deputetja e Partisë Demokratike të Kosovës (PDK), Vlora Çitaku, ka bërë thirrje për zhbllokimin e situatës politike, duke theksuar se “Kosova është më e madhe sesa një emër i përveçëm”.
Çitaku deklaroi se PDK-ja ka qenë “jashtëzakonisht korrekte” dhe ka ofruar zgjidhje për bllokadën aktuale, por situata ka ngecur “ekskluzivisht falë kokëfortësisë së Albin Kurtit dhe ambicies së Albulena Haxhiut.”
Deputetja theksoi sërish ftesën e partisë së saj: “Edhe sot iu bëj ftesë se Kosova është më e madhe se çdo emër i përveçëm.” Kjo deklaratë nënkupton një kritikë të drejtpërdrejtë ndaj insistimit të Lëvizjes Vetëvendosje duke sugjeruar se interesat individuale apo partiake po pengojnë funksionimin e institucionit.
Kjo deklaratë e Çitakut vjen në një moment kritik, pasi Kuvendi sot po bën përpjekjen e 22-të për t’u konstituuar. Dështimet e përsëritura kanë sjellë një presion të madh mbi të gjitha forcat politike për të gjetur një zgjidhje dhe për të vënë në lëvizje institucionet e reja.
