Prishtinë, 31 maj 2025 – Kuvendi i Republikës së Kosovës pritet të mblidhet sot për herën e 24-të me radhë në përpjekje për konstituimin e tij, në një situatë që po zgjat tashmë prej javësh pa zgjidhje konkrete. Seanca do të nisë në ora 10:30 dhe do të mbahet sërish nën drejtimin e kryesuesit Avni Dehari.
Procesi i konstituimit të Legjislaturës së Nëntë ka hyrë në një fazë të stërzgjatur për shkak të mungesës së konsensusit ndërmjet partive parlamentare, sidomos për sa i përket krijimit të komisionit zgjedhor për zgjedhjen e kryetarit të Kuvendit – një hap kyç për vazhdimin e funksionalizimit të këtij institucioni.
Pa propozime të reja për komisionin zgjedhor
Në seancën e fundit të mbajtur të enjten, kryesuesi Dehari ka bërë edhe njëherë thirrje publike për subjektet politike që ende nuk i kanë dorëzuar propozimet për anëtarë të komisionit zgjedhor, të nevojshëm për zgjedhjen e kryetarit të Kuvendit përmes votimit të fshehtë.
Përkundër thirrjes, nuk pati asnjë propozim të ri nga deputetët. Votimi për përbërjen aktuale të komisionit – i bazuar në propozimet nga vazhdimet e mëhershme – rezultoi me 55 vota pro, një kundër dhe asnjë abstenim.
Kriza institucionale vazhdon
Situata aktuale po ngre shqetësime jo vetëm në qarqet politike vendore, por edhe te partnerët ndërkombëtarë të Kosovës, të cilët kanë bërë thirrje për dialog, bashkëpunim dhe përgjegjësi institucionale.
