Ish-presidentja e Republikës së Kosovës, Atifete Jahjaga, ka marrë pjesë në Konferencën për Gratë, Paqen dhe Sigurinë, e mbajtur në Sarajevë, Bosnje dhe Hercegovinë, ku ka folur mbi rëndësinë e qasjes në drejtësi për të mbijetuarit e dhunës seksuale.
Në një postim në Facebook, Jahjaga ka njoftuar se ka qenë folëse në panelin me temën: “Qasja në Drejtësi — Forcim i Lidhjeve Vendore dhe Globale”, duke vënë në fokus nevojën për drejtësi dhe mbështetje për të mbijetuarit.
Jahjaga ka theksuar se edhe gjatë mandatit të saj si presidente, mirëqenia dhe rehabilitimi i të mbijetuarve të dhunës seksuale kanë qenë dhe mbeten një kauzë jetësore, të cilën ajo e mbështet me përkushtim dhe përgjegjësi.
Në Kosovë dhe rajon, ka shtuar ajo, nuk mund të ndërtohet paqe e qëndrueshme pa drejtësinë për të mbijetuarit. Pranimi i dhimbjes së tyre dhe dënimi i krimeve të kryera janë elemente thelbësore të një shoqërie demokratike dhe të shëndetshme.
Në fjalimin e saj, Jahjaga ka përmendur përparimet që ka bërë Kosova në mbështetjen e të mbijetuarve, duke përfshirë adresimin institucional, punën e organizatave joqeveritare dhe ndryshimet ligjore që po hapin rrugë për përmirësime madhore.
Sipas ish-presidentes, bashkimi i forcave dhe bashkëpunimi ndërkombëtar janë kyçe për të ecur përpara në këtë kauzë. Ajo ka bërë thirrje që të forcohen mekanizmat e drejtësisë dhe të mbrohen të mbijetuarit, duke nënvizuar se vetëm përmes veprimit të bashkërenduar mund të arrihet një e ardhme më e drejtë dhe më e sigurt.
“Vetëm bashkë ne mund të bëhemi zëri i tyre!” ka deklaruar Jahjaga, duke ritheksuar nevojën për angazhim të vazhdueshëm dhe veprim konkret.
