Shërbimi Korrektues i Kosovës ka pezulluar sot nga detyra katër zyrtarë të Qendrës së Paraburgimit në Mitrovicë, përfshirë drejtorin e institucionit, një mbikëqyrës të lartë dhe dy zyrtarë korrektues, pas arratisjes së një të burgosuri.
I burgosuri D.R., i dënuar me 14 vjet e 6 muaj, kishte edhe 3 vjet e 7 muaj të mbetura për vuajtje të dënimit. Ai ishte i kategorizuar si i avancuar dhe në momentin e arratisjes po kryente punë në hapësirat e punëtorisë së qendrës. D.R. ishte gjithashtu në listën e të dënuarve që mund të përfitonin lirimin me kusht.
Pasi u konstatua mungesa e tij, autoritetet nisën menjëherë procedurat e brendshme operacionale dhe informuan institucionet relevante të sigurisë.
Shërbimi Korrektues ka hapur hetime të brendshme për të zbuluar shkaqet dhe rrethanat e arratisjes. Deri në përfundimin e hetimeve, katër zyrtarët do të mbesin të pezulluar, ndërsa premtohet se do të ndërmerren masa të plota në përputhje me ligjin.
