Politikania dhe aktivistja venezuelase, María Corina Machado, është shpallur fituese e Çmimit Nobel për Paqe 2025, në vlerësim të përpjekjeve të saj të palodhura për mbrojtjen e të drejtave demokratike të popullit venezuelas dhe luftën e saj paqësore kundër diktaturës.
Në një njoftim zyrtar në rrjetin social X, Komiteti Nobel deklaroi se Machado u nderua “për punën e saj të pandalur në promovimin e të drejtave demokratike për popullin e Venezuelës dhe për përpjekjen e saj për të arritur një kalim të drejtë dhe paqësor nga diktatura në demokraci”.
Kryetari i Komitetit, Jørgen Watne Frydnes, theksoi se ky çmim i jepet “një gruaje që mban gjallë flakën e demokracisë në një kohë errësire që po thellohet”, duke e përshkruar Machado-n si një nga figurat më të guximshme dhe të palëkundura në Amerikën Latine gjatë dekadave të fundit.
“Kjo është pikërisht thelbi i demokracisë: vullneti ynë i përbashkët për të mbrojtur parimet e sundimit popullor, edhe kur nuk biem dakord. Në një kohë kur demokracia është nën kërcënim, është më e rëndësishme se kurrë të mbrojmë këtë terren të përbashkët,” – theksoi Frydnes.
Machado, e cila për më shumë se 20 vjet ka qenë një zë i fortë kundër regjimit autoritar të Nicolás Maduros, ka zgjedhur gjithmonë rrugën paqësore, duke u bërë simbol i rezistencës qytetare dhe shpresës për një të ardhme demokratike.
Përkundër kërcënimeve, burgosjeve politike dhe presioneve të vazhdueshme, ajo ka udhëhequr opozitën me kurajë dhe vizion, duke mishëruar besimin se ndryshimi i qëndrueshëm dhe i drejtë vjen përmes institucioneve dhe pjesëmarrjes qytetare.
“Ajo ka kaluar vite të tëra duke punuar për lirinë, dhe sakrificat e saj janë një frymëzim për të gjithë ata që besojnë në forcën e demokracisë,” – shtoi Frydnes.
