Kualifikimi i Arsenalit në finalen e UEFA Champions League nuk është vetëm sukses sportiv, por edhe një fitore e madhe financiare për klubin londinez.
“Topçinjtë” do të përfitojnë edhe 18.5 milionë euro shtesë vetëm për arritjen në finalen e madhe, duke e çuar totalin e të ardhurave nga ky sezon në rreth 143.5 milionë euro (124 milionë funte). Kjo shifër nuk përfshin të ardhurat nga shitja e biletave dhe marrëveshjet komerciale që lidhen me pjesëmarrjen në këtë garë.
Në rast se Arsenali arrin të fitojë trofeun, atëherë do të sigurojë edhe 6.5 milionë euro shtesë, duke e çuar totalin në rreth 150 milionë euro (129.6 milionë funte).
Për më tepër, triumfi në Ligën e Kampionëve do t’i siguronte londinezëve edhe një bonus shtesë prej rreth 3.5 milionë funte për kualifikimin në UEFA Super Cup.
Një sezon i jashtëzakonshëm për “Topçinjtë”, që po shpërblehet jo vetëm me rezultate në fushë, por edhe me përfitime të mëdha financiare.
