Futbollisti legjendar çek, Pavel Nedved e ka komentuar përballjen mes Kosovës dhe Republikës Çeke, e cila do të luhet më 31 maj në Pragë.
Federata e Futbollit e Kosovës njoftoi sot se i ka aranzhuar dy miqësore për Kombëtaren Dardane, fillimisht me Çekinë e më pas me Andorrën më 7 qershor.
E ish-futbollisti i njohur dhe ikona e Lazios dhe e Juventusit e ka konsideruar Kosovën si një test të mirë për çekët para sfidave të tyre në Kupën e Botës,
Republika Çeke e siguroi pjesëmarrjen në Botërorin 2026 falë “play-off”-it, ku e eliminoi Danimarkën vetëm pas penalltive.
“Mezi presim të kthehemi në ‘Epet Arena’, ku e fituam finalen e ‘play-off’-it ndaj Danimarkës në muajin mars, falë përkrahjes së madhe nga tifozët tanë”, theksoi fillimisht Nedved për mediat çeke.
“Ne besojmë fuqishëm që një atmosferë e shkëlqyer do të mbretërojë në stadium edhe për ndeshjen ndaj Kosovës, që është e fundit para udhëtimit për në Kupën e Botës. E shohim ndeshjen si një test të mirë dhe mundësi që t’ju themi tifozëve mirupafshim para udhëtimit për në Kupën e Botës”, vazhdoi fituesi i Topit të Artë.
Edhe për Kosovën kjo do të jetë një mundësi e mirë për ta parë formën e lojtarëve dhe për ta vazhduar komponimin para sfidave të Ligës së Kombeve, ku Kosova do të luajë në Ligën B, e në grup do t’i ketë Austrinë, Izraelin e Irlandën.
