Conor McGregor pritet të rikthehet pas një mungese të gjatë prej pesë vitesh, në një nga rikthimet më të shumëpritura në historinë e UFC-së.
Luftëtari irlandez do të përballet me Max Holloway në eventin e madh UFC 329, i cili do të zhvillohet më 11 korrik në Las Vegas, raporton The Sun.
37-vjeçari nuk ka zhvilluar asnjë duel që nga viti 2021, kur pësoi një dëmtim të rëndë në humbjen ndaj Dustin Poirier.
Që nga ajo kohë, rikthimi i tij në kafaz është shtyrë disa herë për shkak të problemeve fizike.
McGregor ishte planifikuar të rikthehej edhe vitin e kaluar në një përballje ndaj Michael Chandler, por ndeshja u anulua pas një tjetër dëmtimi që pësoi irlandezi gjatë përgatitjeve.
Conor McGregor konsiderohet si një nga emrat më të mëdhenj në historinë e UFC-së dhe sporteve luftarake.
Në vitin 2016 ai hyri në histori si luftëtari i parë që mbante njëkohësisht dy tituj kampioni botëror në kategori të ndryshme në UFC.
Rikthimi i tij në kafaz pritet të tërheqë vëmendjen e madhe të tifozëve të MMA-së në mbarë botën, ndërsa eventi në Las Vegas konsiderohet një nga më të mëdhenjtë e vitit në sportet luftarake.
