Presidenti amerikan Donald Trump ka lënë të kuptohet se Uashingtoni nuk është i gatshëm të bëjë lëshime të reja ndaj Teheranit, në një kohë kur negociatat për një marrëveshje të re bërthamore mes SHBA-së dhe Iranit duket se po hasin vështirësi.
Duke folur për gazetën The Post, Trump deklaroi se nuk është “i hapur” për asnjë kompromis të ri ndaj Iranit, duke sugjeruar se situata mund të marrë një kthesë më të ashpër nëse nuk arrihet marrëveshje. “Mund t’ju them se ata duan të bëjnë një marrëveshje më shumë se kurrë sepse e dinë se çfarë do të ndodhë së shpejti”, u shpreh ai.
Ai përsëriti gjithashtu qëndrimin e tij se nuk mbështet aktualisht asnjë propozim për lehtësim ndaj Teheranit, përfshirë edhe idenë e një moratoriumi afatgjatë mbi pasurimin e uraniumit, duke theksuar: “Nuk jam i hapur për asgjë tani për tani”.
Sipas raportimeve të mediave ndërkombëtare, pas kthimit nga Kina, Trump ka zhvilluar diskutime me ekipin e tij të sigurisë kombëtare për hapat e ardhshëm, ndërsa priten takime të tjera gjatë javës. Në të njëjtën kohë, disa aleatë të tij politikë, përfshirë senatorin Lindsey Graham, kanë kërkuar rritjen e presionit ndaj Iranit, përfshirë edhe opsione ushtarake, nëse diplomacia nuk sjell rezultat.
Nga ana tjetër, mediat arabe raportojnë se Irani ka dorëzuar një përgjigje të rishikuar ndaj propozimeve të SHBA-së, e cila përfshin një sërë kushtesh të reja. Sipas burimeve, Teherani kërkon një armëpushim afatgjatë dhe një marrëveshje me formulim politik që ruan, siç thuhet, “dinjitetin dhe prestigjin” e vendit.
Po ashtu, Irani raportohet se ka propozuar hapje graduale të Ngushticës së Hormuzit me garanci nga vende si Pakistani dhe Omani, duke ndarë çështjet rajonale nga programi bërthamor. Një tjetër element i raportuar është mundësia e transferimit të rreth 400 kilogramëve uranium të pasuruar në Rusi, në kuadër të një marrëveshjeje të mundshme.
