Edhe pse Lionel Messi konsiderohet gjerësisht si futbollisti më i madh i të gjitha kohërave, edhe ai ka kaluar periudhën e tij si i ri në dhomat e zhveshjes së Barcelonës.
Ish-lojtari i klubit katalanas, Andrea Orlandi, ka zbuluar detaje interesante rreth marrëdhënies së Messit me legjendën braziliane Ronaldinho.
Duke folur në podcastin “HProject”, Orlandi tregoi se Ronaldinho kishte një mënyrë të veçantë për ta mbajtur me këmbë në tokë talentin e ri argjentinas, pavarësisht se e kuptonte shumë mirë potencialin e tij të jashtëzakonshëm.
“Ronaldinho i kërkonte Messit t’i përgatiste kafe,” zbuloi Orlandi.
“I thoshte me shaka: ‘Sa Kupa Bote ke luajtur ti, fillestar?’ Dhe Messi ia përgatiste kafenë. Por ishte një mënyrë për ta mbajtur afër dhe për t’i treguar dashuri. Ishte sikur t’i thoshte: ‘Ti ende nuk je Ronaldinho’.”
Megjithëse kjo mund të duket si një lloj prove për lojtarët e rinj, Orlandi shpjegoi se gjithçka buronte nga respekti i madh që Ronaldinho kishte për talentin e Messit.
“Ishte krijuar një lidhje mes tyre. Kur dy lojtarë e kuptojnë njëri-tjetrin dhe e shohin se janë në një nivel të ngjashëm, mjeshtri përpiqet ta udhëheqë të riun. Kishte shumë afeksion mes tyre,” tha ai.
Sipas Orlandit, Ronaldinho e kishte kuptuar që në fillim se Messi ishte një talent i jashtëzakonshëm dhe nuk hezitonte ta thoshte këtë publikisht.
“Ronaldinho ishte i afërt me të gjithë, por Messit i thoshte: ‘Dreqi ta hajë, je në një nivel ku një ditë mund të ulesh në tavolinën time.’ Në fund, gjenitë e njohin njëri-tjetrin,” shtoi ai.
Ai përfundoi duke thënë se Ronaldinho nuk e kishte të vështirë ta dallonte talentin e Messit, madje shpesh e prezantonte para të tjerëve si pasardhësin e tij.
“Nuk ishte e vështirë të kuptoje sa i talentuar ishte Messi. Ishte si një deklaratë publike nga Ronaldinho: ‘Ky është djali im dhe ai është i jashtëzakonshëm.’”
