E ardhmja e sulmuesit anglez, Marcus Rashford, duket gjithnjë e më larg Barcelonës, pasi kampionët e Spanjës pritet të mos aktivizojnë opsionin prej 30 milionë eurosh për blerjen e tij të përhershme gjatë kësaj vere.
Sipas raportimeve të Mirror, ardhja e Anthony Gordon ka ndryshuar prioritetet e Barcelonës në merkato, duke e shtyrë Rashfordin më poshtë në listën e objektivave të klubit katalanas.
Megjithatë, drejtuesit e Barcelonës nuk e kanë përjashtuar plotësisht mundësinë e vazhdimit të bashkëpunimit me sulmuesin anglez. Një tjetër huazim mbetet në tavolinë dhe mund të shqyrtohet gjatë javëve të ardhshme, nëse kushtet financiare rezultojnë të favorshme për të dyja palët.
Nga ana e tij, Rashford vazhdon të jetë i interesuar për të qëndruar në Spanjë dhe e sheh Barcelonën si destinacionin ideal për të vazhduar karrierën. Megjithatë, me opsionin e blerjes që pritet të skadojë dhe me planet e reja të klubit në merkato, e ardhmja e tij është tashmë plotësisht e hapur.
Vera pritet të jetë vendimtare për 28-vjeçarin, i cili do të duhet të presë zhvillimet e ardhshme për të mësuar se ku do të luajë sezonin e ardhshëm, ndërsa interesimi nga klube të tjera evropiane nuk përjashtohet.
