Arsenali ka nisur një lëvizje të befasishme në orët e fundit për talentin e Lyonit, Malick Fofana, pasi Mikel Arteta kërkon të përforcojë repartin ofensiv para mbylljes së afatit kalimtar.
Anësori belg është shfaqur si një objektiv i rëndësishëm i “Gunners”, pas dështimit në tentativën për të transferuar yllin e Real Madridit, Vinicius Junior, si dhe largimit të pritshëm të Gabriel Martinellit drejt Arabisë Saudite.
Sipas “RMC Sport”, Arsenali po shqyrton mundësinë e transferimit të Fofanas para përfundimit të afatit kalimtar.
Christos Tzolis mbetet përforcimi i vetëm ofensiv i Arsenalit këtë verë, ndërsa kampionët e Premierligës vazhdojnë të monitorojnë tregun për mundësi të tjera për ta fuqizuar sulmin e Mikel Artetës.
Klubi londinez kishte kaluar pjesën më të madhe të verës duke kërkuar një transferim të madh në krahun e majtë, por zhvillimet e fundit kanë bërë që strategjia të ndryshojë në orët e fundit të merkatos.
Vinicius Junior ishte identifikuar si objektivi kryesor i Arsenalit për krahun e majtë dhe “Gunners” ishin optimistë se mund ta bindnin brazilianin të largohej nga Real Madridi deri në fillim të këtij muaji.
Megjithatë, Vinicius rinovoi kontratën afatgjatë me Real Madridin, duke e detyruar klubin londinez të rikthehej në treg për të gjetur një tjetër anësor që do të mund të mbushte hapësirën e krijuar pas largimit të Leandro Trossardit.
Situata te Lyoni ka krijuar një mundësi të favorshme, pasi klubi francez ndodhet në një situatë ku duhet të shesë disa prej lojtarëve të tij.
Fofana, i cili konsiderohet aseti më i vlefshëm i Lyonit, po tërheq interes të madh dhe një transferim mund të realizohet në orët e fundit të afatit kalimtar.
Raportohet se Arsenal ka bërë kontaktet e para për të mësuar kushtet që duhet të plotësojë për ta transferuar 21-vjeçarin në Premierligë.
Anësori belg ka pasur një periudhë produktive në Francë, duke shënuar 19 gola dhe duke dhuruar tetë asistime në 84 paraqitje për Lyonin, që prej transferimit nga klubi ku u rrit, Gent, në vitin 2024.
Raporti shton se Crystal Palace tashmë kishte arritur marrëveshje me Lyonin për transferimin e Fofanas, por vetë futbollisti e ka refuzuar kalimin te klubi nga “Selhurst Park”.
Ky refuzim i ka hapur rrugën një klubi më të madh për të ndërhyrë dhe Arsenali duket se është gati ta shfrytëzojë këtë mundësi.
Sipas David Ornstein të “The Athletic”, Fofana është në mënyrë të vendosur në radarët e Arsenalit dhe madje ka zhvilluar një bisedë private me Mikel Artetën lidhur me një transferim të mundshëm në “Emirates”.
