Policia Rajonale e Ferizajt ka intensifikuar kontrollet në trafik gjatë muajit gusht, me fokus të veçantë te drejtuesit e motoçikletave, skuterëve dhe trotinetëve.
Si rezultat i kontrolleve, janë shqiptuar gjithsej 50 gjoba ndaj drejtuesve të motoçikletave për shkelje të rregullave të komunikacionit.
Sipas Policisë, 27 gjoba janë shqiptuar për drejtim të motoçikletës pa patentë shofer, 11 për mungesë regjistrimi, 4 për drejtim pa helmetë mbrojtëse, ndërsa 8 për kundërvajtje të tjera.
Gjatë kësaj periudhe janë konfiskuar edhe 14 motoçikleta/skuterë dhe 8 trotinetë, kryesisht për mungesë të dokumentacionit të rregullt.
Kontrollet janë zhvilluar në kuadër të planit operativ “Kontrolli i shtuar i qarkullimit të motoçikletave dhe trotinetëve”.
Policia ka apeluar te qytetarët që të respektojnë rregullat e trafikut, kufizimet e shpejtësisë dhe të përdorin helmetën mbrojtëse.
Kontrollet, sipas Policisë, do të vazhdojnë edhe në ditët në vijim, me qëllim rritjen e sigurisë në trafik dhe parandalimin e aksidenteve rrugore.
