Prodhuesi i çelikut ArcelorMittal ka njoftuar pezullimin e prodhimit në fabrikën më të madhe të çelikut në Ukrainë, duke nxjerrë në pah dëmet në rritje që po i shkaktojnë ekonomisë ukrainase sulmet ajrore ruse. Vetëm të premten, në Kiev u vranë pesë persona, përfshirë një 14-vjeçar.
ArcelorMittal tha të premten se e kishte informuar qeverinë ukrainase se funksionimi “i sigurt dhe i qëndrueshëm” i uzinës nuk ishte më i mundur, pasi katër sulme gjatë pesë javëve të fundit shkaktuan dëme të mëdha dhe vranë pesë punëtorë në fabrikën në juglindje të vendit.
Mbyllja përbën një tjetër goditje për sektorin dikur të fuqishëm të çelikut në Ukrainë, i cili më parë përbënte rreth 15 për qind të eksporteve të vendit. Sektori është përballur me presion të shtuar për shkak të sulmeve ruse, si dhe kufizimeve të vendosura nga Bashkimi Evropian, partneri kryesor tregtar i Ukrainës.
Rusia ka intensifikuar muajt e fundit sulmet ajrore në të gjithë Ukrainën, duke përdorur raketa balistike dhe dronë me motorë reaktivë, të cilët kanë goditur biznese, rrjete logjistike, portet e Detit të Zi dhe infrastrukturën civile.
Zyrtarët ukrainas kanë paralajmëruar se ndikimi ekonomik i këtyre sulmeve po ul të hyrat nga taksat dhe po zgjeron hendekun buxhetor të qeverisë, ndërsa Kievi përpiqet të sigurojë financimin e luftës.
“Rusët po e zgjerojnë vazhdimisht operacionin e tyre të përshkallëzimit”, tha presidenti ukrainas Volodymyr Zelensky, duke theksuar se të premten ishte goditur edhe një magazinë ushqimore e përdorur nga McDonald’s.
“Është e rëndësishme që bota t’i përgjigjet të gjitha këtyre dhe që Rusia ta ndiejë përgjigjen ndaj terrorit të saj”, tha Zelensky.
Ndërkohë, Ukraina ka shtuar sulmet e saj ndaj objektivave në Rusi, duke goditur objekte të mbrojtjes dhe energjisë, si dhe kompani të mëdha të shitjes me pakicë online, në përpjekje për të dobësuar të hyrat dhe mbështetjen për luftën e Moskës
