Familja e Liridona Ademajt, e cila u vra nga bashkëshorti i saj Naim Murseli, ka reaguar pas vrasjes së Arlinda Zekajt në Vitomiricë të Pejës.
Një mesazh ngushëllimi nga nëna e Liridonës për familjarët e Arlindës është bërë publik nga vëllai i saj, Leonard Ademaj në Facebook.
Në mesazhin e saj, nëna e Liridonës ka shprehur dhimbjen dhe solidaritetin me familjen e Arlindës, duke thënë se e kupton thellësisht humbjen që po përjetojnë, pasi edhe vetë ka kaluar nëpër të njëjtën tragjedi.
“Ngushëllime nga zemra familjarëve të Arlindës. Si nënë që e kam përjetuar dhimbjen më të madhe në jetë, humbjen e vajzës sime nga krimi, e di mirë se çfarë do të thotë kur ta marrin fëmijën e ta copëtojnë zemrën përgjithmonë”, thuhet mes tjerash në mesazh.
Ajo ka treguar se lajmi për vrasjen e Arlindës ia ka rihapur plagët e dhimbjes për humbjen e vajzës së saj.
“Kur e mora vesh se edhe nje cike e Kosoves, Arlinda, u be viktime e vrasjes, mu rihapen plagte e shpirtit dhe mu copetua zemra prape. Vetem drejtesia e shpejte mund t’i ngushelloje familjaret”, thuhet në mesazh.
