Një përplasje verbale ka ndodhur sot mes Dardan Sejdiut, ish-nënkryetar i Komunës së Prishtinës, dhe kryetarit aktual, Përparim Rama.
Përplasja erdhi pas dështimit të seancës së Kuvendit Komunal, ku në rend dite ishte propozim-vendimi për vënien në shqyrtim publik të Projekt-dokumentit të Planit Zhvillimor Komunal 2025-2033.
Sejdiu e pyeti Ramën se sa lagje kishte vizituar dhe sa qytetarë ishin njohur me planin zhvillimor. Rama reagoi duke thënë: “Të gjitha lagjet e kanë parë. Njerëzit si ti japin dezinformata dhe rrejnë qytetarët”.
E pas përplasjes verbale, një reagim sërish e ka bërë Dardan Sejdiu, duke thënë se Përparim Rama nuk është më i qetë.
“Përparimi tash e ka një problem, është “pak” nervoz. A ju kujtohet ai “londinezi mellow”, i qetë e i pa ngarkuar? Epo, si duket ai s’është më. Tash vendin e tij e ka zënë Përpi, ky sot që pyetjeve i përgjigjet me sulme personale, e që me fundin e mandatit po e sheh që Prishtina ka zo përtej zyrave të Komunës! Për këtë arsye është nervoz. Për këtë arsye pyetjeve të thjeshta po u përgjigjet me akuza e mllef”, ka shkruar Sejdiu.
Tutje, ai ka shkruar se ” Ani, në rregull jemi. Ama nëse mendon që Prishtina është veç kuvend komunal e ka gabim, e sidomos nëse në fund të mandatit don me ja shtu Prishtinës edhe nja 1 milion m² beton! Boll beton”, vijon reagimi i tij.
Ndryshe, sot ka dështuar të mbahet seanca e jashtëzakonshme e Kuvendit Komunal të Kryeqytetit.
Kryetari i Komunës së Prishtinës, Përparim Rama, ka deklaruar se opozita po kërkon transparencë, por se ajo po e bllokon Planin Zhvillimor Komunal të dalë në konsultim publik.
“Nuk i kishim ata asamblistë (VV, PDK) sot këtu. Shohim shumë postime që thirren në jotransparencë, është e kundërta prej asaj që ne po kërkojmë prej një viti e gjysmë. Një dokument që kanë punuar të gjitha drejtoritë, institucionet, qytetarët, një dokument që është i gatshëm për diskutim publik që t’i paraqitet publikut që ta rishikojmë së bashku, të japim komente, propozime, nuk votohet që të dilet në diskutim publik. Tentojmë për transparencë të plotë që një vit e gjysmë dhe ja vazhdon bllokimi i këtij dokumenti”, ka thënë ai.
Në këtë seancë, pikë e rendit të ditës ka qenë propozim-vendimi për vënien në shqyrtim publik të Projekt-dokumentit të Planit Zhvillimor Komunal 2025-2033.
