Policia e Kosovës ka inauguruar zyrtarisht Sistemin e Identifikimit Biometrik (BIS), një projekt strategjik që synon të avancojë mënyrën e menaxhimit të migrimit dhe të forcojë kapacitetet institucionale të vendit. Ky sistem modern është zhvilluar në kuadër të projektit “Përmirësimi i Qeverisjes së Migrimit përmes Programimit të Bazuar në Dëshmi”, i financuar nga Konfederata Zvicerane përmes SEM-it dhe i implementuar nga Organizata Ndërkombëtare për Migracionin (IOM).
Sistemi BIS mundëson regjistrimin, ruajtjen dhe verifikimin e të dhënave biometrike në mënyrë të sigurt, duke rritur ndjeshëm nivelin e dixhitalizimit dhe efikasitetin e proceseve që lidhen me migrimin. Përmes këtij investimi, pritet të përmirësohet siguria, shkëmbimi ndërinstitucional i informacioneve si dhe mbrojtja e grupeve më të cenueshme.
Nëpërmjet një njoftimi zyrtar, Policia e Kosovës ka shprehur mirënjohje të veçantë ndaj Konfederates Zvicerane dhe IOM-it për mbështetjen profesionale dhe teknike në realizimin e projektit.
Institucioni policor theksoi se mbetet i përkushtuar në modernizimin e vazhdueshëm të shërbimeve dhe forcimin e mekanizmave të sigurisë dhe menaxhimit të migrimit, gjithnjë në funksion të qytetarëve dhe komuniteteve.
