Barcelona shpreson të nënshkruajë me një mbrojtës në janar, por po ashtu ka mundësi që një ose dy lojtarë të largohen nga klubi me hapjen e afatit kalimtar dimëror. Kandidati kryesor për t’u larguar është Marc-André ter Stegen, i cili aktualisht gjendet pas Joan Garcia dhe Wojciech Szczęsny në hierarkinë e portierëve.
Ter Stegen së fundmi u rikthye në aksion në fitoren e Barcelonës në Kupën e Mbretit ndaj Guadalajara-s, por kjo pritet të jetë paraqitja e tij e vetme këtë sezon. Hansi Flick e ka bërë të qartë se 33-vjeçari nuk është pjesë e planeve të tij, ndaj i është kërkuar të gjejë një klub të ri për të siguruar minuta loje dhe vendin e tij me Gjermaninë në Kupën e Botës verën e ardhshme.
Bayern Munich ka përjashtuar mundësinë e transferimit të Ter Stegenit, por interesimi për shërbimet e tij është i madh – veçanërisht nga Premier League. Një nga klubet e interesuara është Aston Villa dhe, sipas MD (përmes CaughtOffside), ata kanë kërkuar informacione nga Barcelona për një transferim të mundshëm.
Janë bërë gjithashtu pyetje rreth gjendjes fizike të Ter Stegenit, çka e justifikon vendimin e Flick për ta aktivizuar atë në Kupën e Mbretit, pasi tregoi se është në formë dhe gati për lojë. Ende mbetet e paqartë nëse Aston Villa do të vazhdojë me nënshkrimin e portierit gjerman, i cili mund të jetë i disponueshëm edhe në formë huazimi.
Nuk ka dyshim se Barcelona do të ishte e hapur për një marrëveshje me Aston Villën, por për vetë Ter Stegenin, një transferim te skuadra ambicioze e Premier League do të kishte pak kuptim – përveç rastit kur Emiliano Martínez, portieri aktual titullar i Aston Villës, të largohej gjatë merkatos dimërore.
Kalimi i Ter Stegenit te Aston Villa do të kishte më shumë kuptim gjatë verës, por Barcelona dëshiron që ai të largohet që tani. Në këtë drejtim, do të jetë interesante të shihet nëse klube të tjera do të shfaqen në javët në vijim.
