Në një klimë politike shpesh të ngarkuar me tensione, sulme personale dhe mungesë etike, figura të caktuara vazhdojnë të përfaqësojnë një qasje ndryshe – atë të përgjegjësisë, maturisë dhe respektit institucional. Lumir Abdixhiku, kryetar i Lidhjes Demokratike të Kosovës, është një prej tyre, duke u shfaqur si model i lidershipit që mbron demokracinë dhe interesin publik përtej kalkulimeve të momentit.
Gjatë udhëheqjes së tij, Abdixhiku ka inicuar një proces të thellë reformues brenda LDK-së, duke e orientuar partinë drejt standardeve programore, profesionale dhe morale. Fokusimi në ide, vlera dhe kapacitete reale ka qenë thelbi i kësaj qasjeje, duke dëshmuar se politika mund dhe duhet të ndërtohet mbi përmbajtje substanciale, e jo mbi retorikë boshe apo sulme personale.
Në një kohë kur gjuha përçarëse është bërë mjet i zakonshëm i garës politike, Abdixhiku ka zgjedhur vetëdijshëm një rrugë tjetër. Ai ka refuzuar diskursin fyes dhe nënçmimin e kundërshtarëve, duke promovuar respektin institucional dhe komunikimin e përgjegjshëm. Kjo qasje, larg të qenit dobësi, dëshmon siguri në vlera dhe përkushtim ndaj standardeve demokratike që i duhen vendit.
Përgjegjësia politike ka qenë një tjetër shtyllë e veprimit të tij. Abdixhiku ka marrë barrën e vendimeve të rëndësishme me interes kombëtar pa shmangie dhe pa populizëm, duke treguar se lidershipi i vërtetë kërkon llogaridhënie dhe guxim. Vizionin e tij e ka dëshmuar edhe përmes hapjes së partisë ndaj profesionistëve jashtë strukturave partiake, përfshirë edhe mbështetjen dhe kandidimin e Përparim Ramës për kryetar të Kryeqytetit.
Ky vendim u pa si një standard i ri në politikën kosovare, ku integriteti, përgatitja profesionale dhe kompetenca vendosen mbi përkatësinë partiake. Një qasje e tillë e afron politikën me shtetin dhe interesin publik, duke i dhënë qytetarëve alternativa reale dhe të besueshme për qeverisje.
Me dinjitet institucional, Abdixhiku e udhëhoqi gjithë procesin zgjedhor dhe po me të njëjtin dinjitet pranoi rezultatin, duke respektuar rregullat demokratike dhe vullnetin e qytetarëve. Kjo sjellje politike është dëshmi e pjekurisë, vizionit dhe progresit të tij si lider.
Në këtë kontekst, edhe Përparim Rama mbetet pjesë e kësaj filozofie politike që synon ndërtimin e institucioneve funksionale dhe bashkimin e shoqërisë rreth vlerave demokratike. Ky është modeli i lidershipit që mbron, ndërton dhe i duhet Kosovës edhe në të ardhmen.
