Donald Trump ka kërcënuar se do të ndërhyjë në Iran nëse qeveria e tij vret demonstruesit, duke nxitur paralajmërime nga zyrtarë të lartë iranianë se çdo ndërhyrje amerikane do të kalonte një “vijë të kuqe”.
Në një postim në rrjetet sociale të premten, Trump tha se nëse Irani do të qëllonte dhe vriste protestuesit, SHBA do të “vinte në ndihmë të tyre”. Ai shtoi se “jemi të gatshëm dhe të përgatitur për veprim”, pa shpjeguar se çfarë do të thoshte kjo konkretisht në praktikë, shkruan The Guardian, transmeton Gazeta Express.
Protestat në Iran janë tani në ditën e gjashtë dhe janë më të mëdhatë që nga viti 2022, kur vdekja në paraburgim policor e Mahsa Aminit, 22 vjeçe, nxiti demonstrata në mbarë vendin. Trazirat aktuale u shkaktuan nga një rënie e paprecedentë e monedhës kombëtare të dielën, me rialin iranian që ra në rreth 1.4 milionë për dollar amerikan, duke e përkeqësuar më tej një ekonomi tashmë të goditur.
Shtatë persona janë vrarë, përfshirë një vullnetar të forcës së sigurisë Basij, dhe videot kanë shfaqur forcat e sigurisë duke mbajtur armë gjahu, ndërsa në sfond dëgjohen të shtëna. Në përgjigje të kërcënimit të Trump për ndërhyrje, Ali Shamkhani, këshilltar i udhëheqësit suprem, ajatollah Ali Khamenei, paralajmëroi se siguria kombëtare e Iranit ishte një “vijë e kuqe, jo material për postime aventuriste”.
“Çdo dorë ndërhyrëse që i afrohet sigurisë së Iranit me pretekste do të pritet me një përgjigje që do të shkaktojë pendesë,” tha Shamkhani në një postim në X.
Këto kërcënime vijnë vetëm disa ditë pasi Trump tha se SHBA mund të godasë Iranin nëse zbulohet se ai po rindërton programin e tij bërthamor, duke përshkallëzuar më tej tensionet mes dy vendeve
