Manchester City është ndalur sërish në Premier League, duke barazuar 1-1 me Chelsean në një ndeshje dramatike të vendosur në minutat shtesë.
Ky ishte barazimi i dytë radhazi për ‘Qytetarët’ në vitin 2026, pas një serie prej tetë fitoreve radhazi në fund të vitit të kaluar.
Kjo sfidë u zhvillua në një atmosferë të veçantë për Chelsean, pas largimit të papritur të trajnerit Enzo Maresca.
Trajneri i përkohshëm, Calum McFarlane, zgjodhi një qasje të kujdesshme, e cila në minutat e para e neutralizoi lojën sulmuese të Cityt. Rasti i parë i ndeshjes i takoi mysafirëve, kur gjuajtja e Estevaos u bllokua nga Josko Gvardiol.
Me kalimin e minutave, vendasit morën kontrollin e lojës. Phil Foden humbi dy raste të mira, ndërsa Bernardo Silva gjuajti mbi portë. Erling Haaland iu afrua golit pak para përfundimit të pjesës së parë, por goditja e tij e fortë u ndal në shtyllë.
Presioni i Cityt u konkretizua në minutat e fundit të pjesës së parë, kur Tijjani Reijnders shënoi nga një kënd i vështirë, duke kaluar Cityn në epërsi 1-0.
Chelsea reagoi menjëherë pas pushimit. Pedro Neto humbi një rast të artë për barazim pas një kundërsulmi të shpejtë.
City vazhdoi të krijojë raste, por mbrojtja londineze rezistoi, ndërsa një rast i pastër i Liam Delap u ndal nga portieri Gianluigi Donnarumma.
Lëndimet e Josko Gvardiolit dhe Ruben Diasit në minutat e fundit dobësuan mbrojtjen e Cityt, duke i dhënë shpresë Chelseat.
Në minutën e katërt shtesë, Malo Gusto asistoi nga krahu i djathtë, ndërsa Enzo Fernandez u gjend në vendin e duhur për të shënuar golin e barazimit 1-1.
Ky rezultat e lë Manchester Cityn gjashtë pikë prapa Arsenalit në renditje dhe i jep fund një serie prej tetë fitoresh radhazi në shtëpi në kampionat.
Nga ana tjetër, Chelsea siguron një barazim të rëndësishëm në ndeshjen e parë nën drejtimin e trajnerit të përkohshëm McFarlane, duke treguar dhënë pozitive për vazhdimësinë e sezonit
